Shillong Nailar 05: Ka Hynniewtrep Youth Council (HYC) kala pynpaw iaka jingsngew artatien ba ki riewkheinduh ialade ne ki kynhun Jihadi kilah ban pyndonkam iaka jylla kum ka jaka riehtngen namar ka jingbymdon ia ki ain ki kanun kiba biang kum ka Inner Line Permit (ILP) bad ka Meghalaya Residents Safety & Security Act (MRSSA).
Katkum ka kyrwoh na u General Secretary ka HYC u Bah Roykupar Synrem u la pynpaw ba ka jylla Assam kala kylla long kum ka jaka kaba ki Jihadi kila shong bad riehtngen bad kane kala paw pyrthei ha kaba bun ngut ki briew kiba dei naka kynhun Jihadi kila shah kem na katei ka jylla ha kine ki khyndiat bnai bad ka long kaei kaei kaba sngewkhia naka bynta ka jingshngain jong ka jylla Meghalaya khamtam haba ka don haduh 800 km tam u pud ha shi lynter bad ka Assam bad kumba 443 Km ka jingiajan u pud u sam bad ka ri Bangladesh.
Haba kdew iaka jingkren u Myntri Rangbah ka jylla u Conrad K Sangma ba ka sorkar kan peitngor bha halor ka jinglong jingman ha Assam, na ka liang u Roykupar Synrem u la ong, “Ngim sngewthikna la ka sorkar jylla kan lah ban peitngor iaka jingrung jingmih jong ki briew khamtam kito kiba wan na Assam haba ngim don iaki ain ki kanun kiban tehlakam ne pyrkhing iaka jingrung jong ki briew shapoh ka jylla.
“Namar ka jingbym don ka ain kum ka ILP bad ka Meghalaya Residents Safety & Security (Amendment) Bill, 2020, ia kaba ngi la dawa mynta la bun snem, ngi sngewkhia ba ki kato katne ki jaka ha Meghalaya ki lah ban shah pyndonkam ha ki kynhun Jihadi kum ka jaka shong bad jaka riehtngen bad ban bteng ban leh ia ki kam pyntriem kaba lah ban buh iaka jingim jong ki nongshong shnong haka jingma kaba khraw” ong u General Secretary ka HYC.
U la ong, ka jingthmu ban pyntreikam iaka ILP bad ka Meghalaya Residents Safety & Security (Amendment) Bill, 2020 ka long ban pynthikna ban ai jingshngain ia ki nongshong shnong ka jylla bad ban tehlakam ia kino kino ki riewsniew ba kin ioh jaka riehtngen ha ka jylla kiba lah ban pynthud iaka shongsuk shongshngain iaka jylla.
“Ngi lahdei ban long kiba shngain bad kiban ioh jingiada na kano kano ka jingthmu jong ki kynhun Jihadi ban rung shapoh ka jylla, lada dei ba ngi don iaka ain kum ka ILP bad MRSSA Bill, 2020 bad la pyntreikam pura ia ki” ong u Bah Synrem.
Ha kawei pat ka liang, u nongialam ka HYC u la ong, watla ka iingdorbar thawain ka jylla kala mynjur da ka Resolution haka 19 tarik u Nohprah 2019 ban dawa pyntreikam iaka ILP haka jylla bad la mynjur ruh iaka MRSSA Bill, 2020 ha ka 19 tarik u Lber 2020, hynrei ka paw ba na ka jingkren u Myntri Rangbah ba kitei kiar tylli ki ain kiba kongsan ki dang don hapdeng ka jingkhmih bniah jong ka Ministry of Home Affairs jong ka sorkar pdeng.
“Ka sorkar jylla ka jong ngi ka shu heh tang ka tyngam ba ka sngewkhia shisha bad ka trei na ka bynta ban iada ia ki nongshong shnong bad ia u paid Hynniewtrep, hynrei haba khmih bniah ki kam pat ki pyni da kumwei” ong u Nongialam ka HYC.
“Ka jingdawa ban ialam ia broh ki seng sain pyrthei ne ia baroh 60 ngut ki MLA ka jylla sha New Delhi, ka dang don hapdeng ka jingkhmih bniah jong u Myntri Rangbah ka jylla bad ka sorkar jylla. Kumba ka paw baroh ki mat kiba kongsan jong ka jylla ki dang don lut hapoh ka jingshah khmih bniah bad kam shim la mih kano kano ka resol haduh mynta. Kane kadei kaba sngewsih kthang haka jylla Meghalaya hapoh ka jingialam jong kane ka sorkar kaba mynta. Hynrei ka jingpynkhamti ia ki kam kontrak, khlem da khuslai haduh katno ka dor ka heh, lah ban ai ia katei ka kam tang hapoh ki kato katne sngi ha kaba ka jingtreikam ruh ka long kaba da sted bha” ong u Bah Synrem.
Ka HYC kala maham iaka sorkar jylla ba kadei ban shim iaka jingkitkhlieh lada don kino kino ki kynhun Jihadi kiba leh ia kino kino ki kam pyntriem kaban shim syndon iaka jingim jong ki nongshong shnong ka jylla.
“Lada ka sorkar jylla ka pulom ha kaban pynkohnguh iaka sorkar pdeng ban pyntreikam iaka ILP ha ka jylla bad lada don kino kino ki jingjia kiba sngewsih, kiba la leh da ka kynhun Jihadi kaban shim wat iaka jingim jong ki nongshong shnong ka jylla, kumta ka sorkar MDA kaba ialam daka NPP bad ka BJP ryngkat bad ki MLA na ki seng bapher kin hap ban shim iaka jingkitkhlieh. Namar kadei na ka jingbym shimkhia ka jongki ba ka jylla bad ki paidbah kila duh ia ki ain kiba lah ban iada iaka jylla” la pynkut u Bah Synrem.
