Shillong, Nailar 06: U Symbud Myntri Rangbah ka Jylla Bah Prestone Tynsong ula pyntip ba ka Sorkar Jylla kala dep iakren sha Delhi halor ka jing donkam ban leh eiei ia ka jingkiewdor ki marbam mardih kaba la ktah jur ia ki paidbah.
“Ngi lah dep iakren. Ym tang ka Jylla Meghalaya hynrei kiwei ki Jylla ruh kila dep iakren bad ka Sorkar Pdeng” ong u bah Prestone haba iakren bad ki nongthoh khubor.
Kat kum ka jingong jong u, kane ka kam ka dei kaba hap iakren ym tang ha ka kyrdan jong ki sorkar Jylla hynrei jong ka sorkar pdeng ruh kumjuh.
“Phim lah ban kynnoh ia ka sorkar Jylla namar ki don ki jaitkam kiba ngi donkam ban iakren bad ka sorkar pdeng. Ta ka daw kumba paw mynta hi, ka sorkar pdeng kala pyrshang ban leh eiei ia kane ka jingeh” ula ong.
Ha kajuh ka por, u Bah Prestone ula pyntip ruh ba ka sorkar kala dep bthah ia baroh ki Deputy Commissioner ba kin pynim ia ka jingtreikam jong ki District Monitoring Committee ban peitthuh ia ki iew ki hat jan man ka sngi bad ban weng ia ki jingeh namar ka jing kiewdor ki mar ki mata.
