Shillong, Nailar 6 : U Symbud Myntri Rangbah ka jylla Bah Prestone Tynsong ha ka sngi Thohdieng u la pyntip ba shen yn sa sdang noh ka sorjamin ia ka jaka na ka bynta ban tei ia ka jingkieng ba thymmai halor ka wah Umiam.
Haba kren bad ki lad pathai khubor u Bah Prestone u la iathuh ruh ba ka tnad ka la dep ban ia kren ruh bad u Consultant na bynta ka jingtei ia ka jingkieng ba thymmai kaban long ka jubab ia ka jingsyier kaba man ka por halor ka jingma jong ka jingkieng rim kum ha pung umiam ha kaba la hap ban mana ia ka jingkitkhia jong ki kali.
“U consultant ula don mynta ha ka kam bad ka sorjamin ia ka jaka kan sa sdang noh shen. Un sa phah ruh shen ia ka detailed project report (DPR) sha ngi ba ngin ioh mang tyngka noh na bynta katei ka projek,” u la ong.
Katkum ka jingong jong u, ka tnad ka la dep ban jied ruh ia ka jaka na ka bynta ban tei ia katei ka jingkieng ba thymmai kaba la mang ban shna kham sharum na ka jingkieng rim.
Haba iadei pat bad ka surok Shillong-Western bypass, u Symbud Myntri Rangbah u la iathuh ba ki deputy commissioner jong ka Ri Bhoi bad East Khasi Hills district ki la don mynta ha ka kam ban pynkhreh na ka bynta ka jingshim jaka.
“Ngi aiti mynta ha ki deputy commissioner ban leh ia kaba donkam,” u la bynrap shuh shuh.
Haba kren pat bad ka jingsniew palat ka surok Shillong sha Jowai u Symbud Myntri Rangbah ula ong ba ka jingsniew ka sdang na Mawryngkneng ter ter kumta ka sorkar tang shu kut ka Lyiur kan sa sdang noh ban phah maramot.
“Ngin pyntikna ba ha ka por tlang ngin sa lah ban pynbha biang ia kane ka surok,” u la kular.
