Shillong, Risaw 23: U Deputy Commissioner (DC) ka East Khasi Hills u Abhilash Baranwal ula pyntip ba ka Sorkar kala aipor 1 bnai ia ki kompani Telephone ban pynbeit lane weng ia ki Waiar bym treikam shuh bad la bthah ruh ia ki kompani ban pynthikna ba ka jingteh ne wah ia ki Waiar kan long kaba ryntih bad kam dei ban pynijakhlia ia ki surok.
Hynne ka sngi Thohdieng u Deputy Commissioner ula leit jurip ia ki Waiar ha ki thaiñ Laitumkhrah kaba dei ruh shi bynta jong ka jingbthah u Myntri Rangbah ka Jylla u Conrad K Sangma ban pynthikna baka sor Shillong ka long kaba itynnad.
Haba kren sha ki lad pathai khubor u Deputy Commissioner ula ong, ba ka Sorkar kala bthah ia ki kompani Telephone ba kidei ban pyniaid bha ia ki Waiar haba ki teh thymmai bad la bthah ruh ia ki ban weng noh ia kito ki Waiar ki bym treikam shuh.
U DC ula ong, ba katkum ka jingbthah jong u Myntri Rangbah ka Jylla baroh ki Waiar Cable ki bym don jingiaid beit ha ki Pole ba dei ban iaid, dei ban pynthikna ban iaid beit bad kim dei ban noh rynjaw sha surok.
“Ha kaba iadei bad ki Box bad ki Waiar ki bym pyndonkam shuh, la bthah ba kidei ban weng noh, kane ka jingthmu kadei ban wanrah ka jingitynnad ia ka sor Shillong bad ha kajuh ka por ban long kaba khuid ba suba” la ong u DC.
U DC ula ong, hadien shibnai lada katto katne na ki waiar kim shym la weng, ki bor District kin wan hi ban ot bad weng noh ia ki Waiar.
