Shillong, Risaw 23: U Deputy Commissioner (DC) ka East Khasi Hills u Abhilash Baranwal ula ong, ba ki bor synshar district kala pynkhlain ka jingiadei bad ka jingiatreilang bad ki nongshong shnong ban rat dyngkhong ia ki kam bymman khamtam hadien jur ka jingshah kawang petrol bomb ha kine ki khyndiat sngi.
Haba iakren bad ki nongpathai khubor hynne ka sngi, u Deputy Commissioner ula ong, ba ki bor district kila shong jingialang haba iadei bad ka jingshah ktah ka shongsuk shongsaiñ ha kaba iadei bad kine ki jingkawang petrol bomb.
Ula ong, ba ki bor synshar district ka don ar tylli ki kam ban leh, kawei ka long ban don ki lad ban iajan bad ban iatreilang bad ki shnong ki thaw bad ki nongshong shnong bad ia kane la leh lyngba ophisar bad ki sector magistrate.
