Sah ka UDP sa tang Uwei u MLA hapoh ka ïingdorbar thawaiñ
Shillong Risaw 23: Ka seng United Democratic Party kala mad ia ka jingtynjuh kaba khraw, haba u Lamphang ka ïingdorbar thawaiñ ka Jylla u Thomas A Sangma hynne ka sngi Thohdieng, ula pdiang ia ka jingleit pyniasoh jongki 3 ngut ki MLA ka UDP sha ka seng National People’s Party (NPP).
Kane ka jinglong jingman, kala pynkylla syndon ia ka UDP kum ka seng kaba wan baar ha ka jingbun paid hadien ka elekshon MLA mynta ba kan sah thik sa tang uwei u MLA.
Ka Assembly Secretariat kala pynmih ia ka hukum ha ka sngi Thohdieng bad pynpaw ba ki 3 ngut ki MLA kiba kynthup ia u Bah Paul Lyngdoh (West Shillong), Bah Renikton Lyngdoh Tongkhar (Mawkyrwat) bad u Bah Nujorki Sungoh (Mowkaiaw) kila leit mih hakhmat u Lamphang ha ka 17 tarik u Risaw ban pynpaw ia ka jingthrang ka jongki ban pyniasoh noh bad ka NPP.
Kila kam ba kila don ia ka ‘Two-Third’ ha ka jingdon ia u nombar hapoh jongka Paragraph 4(2) jongka Tenth Schedule bad kila pynpaw ruh ia ka Resolution jong ka seng UDP kaba lah rai ban pyniasoh bad ka NPP.
Hadien ba kila khmih bniah dalade bad pynshisha ia kitei ki kot ki sla hakhmat jong u Lamphang ha ka 19 tarik u Risaw, u Lamphang ula pdiang ia katei ka jingpyniasoh ka jongki.
Ha ka hukum la pynkynmaw ruh ba ha ka 16 tarik u Risaw, 8 ngut ki MLA ka UDP kila leit pyniasoh bad ka BJP, kaba la pynlong ia ka jingkhlain jongka UDP Legislature Party ban don noh sa tang 4 ngut. Ha ka sngi Thohdieng ka jingpyniasoh jong ki 3 ngut bad ka NPP kala pynhiar ia ka jingdon ka UDP sa tang uwei u MLA.
U Lamphang ula bthah ba ia ka rukom bhah ia ki jaka shong na ka bynta kine ki 3 ngut ki dkhot ban long noh ki dkhot jongka NPP.
“Kitei ki kyrteng hajrong jong ki 3 ngut ki dkhot kam long shuh kaba duna ia ka Two-Third jong ka jingdon ki dkhot ha ka United Democratic Party Legislature Party ha ka Meghalaya Legislative Assembly. U Lamphang namar ka jingsngewhun ba ki lah rai ban pyniasoh da la ka mon sngewbha sha ka National People’s Party, ula pynmih ia ka hukum ha ka 23 tarik u Risaw da kaba shim ia kitei ki jingshisha baroh, ula pdiang ia katei ka jingpyniasoh bad ka National People’s Party hapoh ka Paragraph 4 jongka Tenth Schedule ka riti synshar ka ri India bad la bthah ba ka jingbhah ia ki jaka shong jong kitei ki 3 ngut ki dkhot dei ban long noh kum ki dkhot jong ka NPP ha ka Meghalaya Legislative Assembly” la pynpaw ha ka hukum.
