Shillong, Risaw 23: U Bah Sniawbhalang Dhar u Symbud Myntri Rangbah ka Jylla, uba dei ruh u National Vice President jong ka NPP, ha ka miet jong ka sngi Palei, ula kynthoh jur ïa ki seng ka liang pyrshah, kynthup ïa ka Voice of the People Party (VPP), da kaba ong, ba man la ka jingkynthoh pyrshah ïa ka sorkar, ka nang pynkhlain shuh shuh ïa ka.
Haba ïalap elekshon na ka bynta u kyrtong ka NPP ba ïakhun ïa ka elekshon sha Shillong Lok Sabha u Dr DRL Nonglait ha Mihmyntdu, u Bah Dhar ula ong, “Wat kren beiñ ïa ki MLA jong ngi namar katba nang kren beiñ katta ki nang bun, na ka 33 ngut ki MLA ka NPP ngi la poi sha ka 36 ngut.”
“Kane kadei ka jingshaniah ha ki nongialam jong ka jylla jong ngi,” ula ong, haba batai ia ki jingkhein: “Ngi la jop 26 ngut, ngi la nang kiew ryngkat bad ka jingpyniasoh lang ia ki MLA ka PDF, ngi la poi sha ka 28 ngut, ka Congress ka la iasoh, kala poi sha ka 31 ngut, ngi la jop ia ka byelection ngi la poi sha ka 33 ngut bad sa shisien pat 3 ngut ki MLA ka UDP ngi la poi sha ka 36 ngut.”
“Kane kadei ka jingtreikam jong ka sorkar hapoh ka jingialam jong ka NPP bad hapoh ka jingialam u Myntri Rangbah ka Jylla u Conrad K Sangma,” ula bynrap.
U Bah Dhar ula pynpaw ba ki nongialam ka Liang Pyrshah kum ki bym donkam bad ki bym pat san ha ka jingmut jingpyrkhat, da kaba ong, “Ha ka ktien Pnar jong ngi, ngi khot ia ki kum ki briew ki bym don kam don jam. Ka khiew kaba thylli ka pynmih shibun ka jingsawa.”
“Haba ka result matrik ka sniew, ki kynnoh ia ka sorkar. Haba ngi la wanrah ia ka CM Guidebook bad baroh ki khynnah ki pass, hangta ruh ki wad daw. Lada phim sngewthuh ia kaei kaba phi kren, phim long kiba bit ban long ki nongialam jong ka Jylla Meghalaya,” ula ong.
Khlem da jer kyrteng ia ki party, ula byrngem ia ki jingkular lamler ha ka por elekshon: “Kumno ki kular ha ka por elekshon ba lada ngi jop ngin ai kam ia ki samla, hynrei shisien ba ki jop ki beh noh ha ka jaka kata ia ki briew kiba la trei palat 10 snem ha ka district council… Ki ong ruh ba lada ki jop ngin rat dyngkhong lut ia ki khyrdop baroh lada jop ma ki… mynshuwa, mynta ka jingdon jong kine ki khyrdop ka la nang kiew sha ka 30 tylli.”
“Ka long kaba suk ban shu kren hynrei ban pyntreikam pat kam long kaba suk. Ki bym don ha ka bor ki lah ban kren katba ki mon hynrei lada ioh ia ka bor, phin nym tip ruh shano ban soi,” u la ong.
Halor ka roi ka par bad ka jingpyrshah ia ki projek, ula ong, “Kane ka sorkar kam pynleit jingmut tang ha ka liang surok hynrei ka pynleit jingmut ruh ha ka kam jngohkai pyrthei… Bun ki paralok kiba don ha Khasi Hills, kino kino ki projek kiba wan ki pyrshah, nga la dep ong, ngin shim lut ia kine ki projek kiba ki pyrshah sha Jaintia Hills. Lada wan hotel, lada wan ruh ki Ropeway ki pyrshah.. ujor, lada ngim trei ruh phi ujor.”
“Ka sorkar kaba khlem shah kynthoh ka dei ka sorkar kaba thiah lyngngai ha ka por mynsngi,” ula bynrap.
Haba kynthoh pyrshah ïa ka politik pyrshah jong ka VPP, ula ong, “Phi ïohi haba ka VPP ka pynkhih ïa ki paidbah ban ker kut ïa ka secretariat da ki lak… kawei ka kmie haba ki lad pathai khubor ki kylli balei phi wan kala ong, ba ngi wan na ka bynta ki shiphew tylli ki mat hynrei haba kylli kiei kita ki mat kala ong ba ngam tip. Hangne phi lah ban ïohi ba ki paidbah ki long kiba shida namar ki don kiba khot iaki kumta ki shu wan, ki shu leit beit khlem da tip ia kaei kaei hynrei ki khlem pyrkhat ia kaei ki ia leit”.
“Ngi kum ki nongialam ngi don ka jingthmu ban pynthikna ba ka lawei jong ki khun ki kti jongngi kan long kaba phyrnai hynrei lada ki paidbah ki dei kito ki bym lah ban iohi jngai ha kaba jied ia ki nongmihkhmat jong ki, phin long kiba rem nyngkong, ngim dei kiba shah rem,” ula ong.
U la bynrap ruh ba ka sorkar ba la ialam da ka NPP hapoh u Myntri Rangbah ka jylla u Conrad K Sangma kan dang iai bteng ban pynpoi, da kaba ong, “Ngam ju shim ia ka rai kaba dei, nga shim ia ka rai bad nga pynlong ia ka kaba dei. Ka roi ka par kaba la wan ha ka jylla jong ngi ka long ka jingkyrkhu kaba khraw.”
