Shillong, Nohprah 10 : Palat 749 tylli ki tyllong umbam umdih ha Meghalaya kila ioh ia ka jingithuh kum kiba don jingma bha (critical) ban ring tyrkhong noh.
Kat kum ka jingiathuh u Myntri ka Tnad PHE Marcuise N Marak, ka Tnad kan sa shim ia ki sienjam ba donkam ban pynim bad iada ia kine ki tyllong um.
“Ha u snem bala lah, kumba 749 tylli ki tyllong um la ia ithuh kum ki tyllong ba don jingma bha. Ngin hap ban shim ia ki sienjam ban pynim pat ia kine ki tyllong um” ong u Marak haba iakren bad ki lad pathai khubor.
“Namar kata, ngi la khot ia ki stad ki jhad bad pynkhreh ia ka project. Ngi kyrmen skhem ba hadien bala dep kine kiei kiei, ngin sa lah ban pyntreikam ia ka project, nga tharai kan sdang ha kane ka aiom ba dang khreh thung jingthung” ula ong.
Halor ka jingkylli, u Marak ula ong “Ngam lah ban iathuh ha phi mynta namar ka jingpynkhreh ia ka Detailed Project Report (DPR) ka dang iaid bad ki stad ki jhar ki dang pyrshang ban wad ia kino kiba don jingma duh. Kila don sha ki jaka bapher bapher ban wad bniah ia ki tyllong kiba kham don jingma duh bad hadien kane kin sa pynkhreh ia ka DPR”.
Nalor kane, u Myntri u pyntip ba ka Sorkar Jylla ka don jingthmu ban pyntreikam ia ka Internet of Things (IoT) technology ban peit pyrman ia ka jinglong ka um ha ki wah bad ki jaka lang um ha poh ka Jylla.
 ban ring tyrkhong noh.){kind=link}