Shillong, Nohprah 10 : U Myntri ka Tnad Public Health Engineering (PHE) Marcuise N Marak ha ka sngi Ba-ar, ula pyntip ba ka Tnad kala buhthong ban trei pyndep noh ia ka Jal Jeevan Mission (JJM) hapoh u bnai Lber 2025.
Haba kren sha ki lad pathai khubor, u Marak ula ong ba haduh 81.39% ki kam ki dei kiba la dep ban pyntrei haduh mynta.
“Ka aiom treikam ka dang shu sdang bad baroh ki contractor bad ki kompani kila sdang ban pyniaid shakhmat ia ka kam bad ngin pyrshang katba lah ban pyndep ia ka jingpyntreikam baroh hapoh u Lber jong u snem ban wan” ula bynrap.
Ki don palat 6000 tam ki project hapoh ka JJM bad baroh ki dei kiba la buh ha ka geo tag (buh dak kat kum ki jaka). “Baroh ki project kila ioh ia u tag (buh dak) lem kumta ngin ym ioh pisa satia na ka Sorkar India” ong u Marak.
U Myntri ula pyntip ba katto katne ki project ki dei ki bym shym la lah ban pyndep namar ki jingeh ba iatakhuh kynthup ka jingslem ban ioh ia ka forest clearance.
Nalor kane, u Marak ula pyntip ruh ba ka jingring tyrkhong jong ki tyllong um ruh ka dei kawei kaba ktah bha ia ka jing pyntreikam ia ka JJM.
