Shillong, Naitung 8 : U Chief Executive Member (CEM) jongka Khasi Hills Autonomous District Council (KHADC),Bah Titosstarwell Chyne u la pyntip ha Iing Dorbar ba ka Council ka la dep ban ai haduh 16 tylli ki clearance certificate da ka tnad Khlaw na ka bynta ban pynieng ia ki karkhana coke.
Haba jubab halor ka jingkylli ba wanrah da u MDC ka Nongstoin halor ki kyndon ban ai jingbit iakitei ki karkhana, u Bah Titos u la ong ba ka jingbit lane ka jingai ia ka No Objection Certificate (NOC) la ai sha ki kompeni namar kito ki jaka ba tei ne pynieng kim hap ha ki jaka khlaw.
U CEM u ong ruh ba ki don bun bha ki karkhana coke ha West Khasi Hills bad South West Khasi Hills tangba um don ki jingkhein kaba tikna katno tylli ki don lane ka kyrteng jong ki trai kiba la aplai ia ka clearance certificate.
