Shillong, Naitung 8 : U Chief Executive Member (CEM) ka Khasi Hills Autonomous District Council (KHADC), Bah Titosstarwell Chyne u la pyntip ba ka District Council ka la don ha ka jingpynkhreh ban shimti noh ia ka jaka ba la thied da ka Council ha Mawkyrwat, South West Khasi Hills.
U CEM u la iathuh ia kane haba jubab halor ka jingkylli ba wanrah da u MDC ka Mawkyrwat, Bah Carness Sohshang haba iadei bad ka jingshimti ia katei ka jaka. Nalorkata u Bah Titos u ong ruh ba ka Council kam don satia ki rekod kiba pyni ba ki la thied ia katei ka jaka ha Mawkyrwat hynrei ka la ioh jingtip ba ka District Council ka don ar tylli ki jaka ha katei ka distrik headquarter.
Ha kajuh ka por u Bah Carnes u la iathuh ba ka Council ka la thied ia katei ka jaka ha Lawlawsang ha u 2014 ha ka por ba u Bah Ardent Miller Basaiawmoit u bat kum u CEM.
Halor kane, u Bah Titos u la ong ba ka kot sla original kaba iadei bad katei ka jaka ba thied ha Mawkyrwat ha u Nailur 2014 kam don satia bad ka la jah.
U ong ruh ba ka EC kam kyntait ba ka don ka jingpynslem ban shimti noh ia katei ka jaka kaba long ka dawe ba kim lah ban tei ia ka ophis treikam jong ka Council ha Mawkyrwat. Nalorkata, u kular ha Iing Dorbar ba ka EC kan phah tohkit halor kane ka phang khnang bakin lah ban shimti noh ia katei ka jaka.
