Shillong, Naiwieng 11 : U Myntri Sorkar bad MLA ka South Shillong Bah Sanbor Shullai ha ka sngi Balang ula mih na ka jingialang jong ka South Shillong Advisory Committee, haba kynnoh ba ki dkhot ka Joint Action Committee (JAC) kila pynthut ia ka jingiakren ha ka jaka ban ai ia ka jubab kaba shai halor ka jingtyrwa ban thung ia ka Expert Committee ba laitluid ka ban tohkit ia ka Shillong Peak Ropeway Project.
Kane ka jingialang, bala pyniaid da u Bah Sanbor, kala wanrah lang haduh 26 tylli ki kynhun na ka constituency, kynthup ki Dorbar Shnong bad ki Sengbhalang ka thain, ban iakren halor ka jingsngew khia jong ka JAC ba kane ka project kan ktah ia ka tyllong um.
U Bah Sanbor ula iathuh ba ka Committee kala rai ban dawa ia ka jingwadbniah da ka kynhun ki riew shemphang ba laitluid bad ban ialam ia ka kynhun ha kaban iakynduh ia u Myntri Rangbah Conrad K Sangma, kaba shong ha ka jingpdiang ia ka jingtyrwa.
“Kum u MLA ka thain bad u President ka Advisory Committee jong ka 19-South Shillong Constituency, ngi la mynjur ia ka rai ban buh hakhmat ka Sorkar” ula ong. “Ngi la khot ia 26 kynhun napoh ka constituency, kynthup ka Dorbar Shnong Riat Laban, ki Seng Samla bad ki sengbhalang ba don ha ka thain. Nga la pyntip ha ki ba lada ki pdiang ia ka jingtyrwa, Ngan sa ialam ia ka kynhun ban iakynduh ia u Myntri Rangbah Conrad K Sangma”.
Ula pule ia ka rai :
“Ka South Shillong Advisory Committee, hadien ba pyrkhat ia ki jingsngewkhia bala pynsngew da ka Joint Action Committee bad kiwei kiwei ki kynhun, kala rai ban iakynduh ia u Myntri Rangbah ryngkat bad ki dkhot ka Dorbar Shnong Riat Laban bad ban kyrpad ia ka Sorkar ba kan thung ia ka Expert Committee ka ban kynthup ia ki stad technical bad environment na ki jaka pule kiba paw eh ha ka Ri, kynthup ka IIT lane NIT lane kiwei ki jaka pule, ba kin pynlong ia ka jingtih bniah halor ki mat bala pynsngew da ka JAC”.
“I aka rai la shim ban pynthikna ba ka agency ba laitluid kan shong bishar la kane ka project bala tyrwa, kan don jingktah ne em ia ki tyllong um” ula bynrap.
U Bah Shullai ula ong ba ka jingtyrwa kala mih hadien ka jingbatai ka Sorkar ba ka ropeway ka jrong 3.15 km na Lum Shyllong bad baroh ki hynriew tylli ki tower ki don shabar ka Umiew catchment area.
“Ki umpohliew ba bsa umbam umdih ia ka Oxford Hill, Zigzag Road, Rilbong, Kench’s Trace, Lum Sohphoh, Lum Dorbar, Lower Lumparing bad Mylliem ki don shabar ka lynti iaid jong ka project. Ka umpohliew kaba jan eh ka jrong kumba 1 km” ula ong.
Ula ong ba ka Dorbar Shnong kala ai ia ka NOC ha ka 16 tarik Kyllalyngkot, 2023 hadien ba dep shong pyrkhat ia ka jingbatai ka Sorkar, bad ia ka jingaiwai jaka la iasoi hakhmat u paidbah ha Lum Shyllong, ia kaba la pyni ruh da ka video sha ki nongshongshnong.
Ula kdew ia ki jingai jingbit na ka Ministry of Defence ha ka 7 tarik Nailar, 2023, ka Airport Authority of India ha ka 24 tarik Iaiong, 2023 bad ka Forest Clearance na ka Ministry of Environment, Forest and Climate Change ha ka 24 tarik Risaw, 2024.
“Ki jingai jingmut kiba nga la kren ki dei kiba ai da ka Sorkar. Ki dkhot ka JAC bad kiwei ruh ki lah ban ai ia ki jingai jingmut jong ki, bad hadien kane ngin sa pynbeit ia ka jingialang bad u Myntri Rangbah hadien ba sngap ia ki jingai jingmut jong ki” ula ong.
Kat kum ka jingong u Bah Sanbor, ki dkhot ka JAC kila kyntait ban batai la ki pdiang ne em ia ka jingtyrwa bad ha ka jaka kane, kila jied ban tynjuh pyrshah.
“Ngi la ailad ia baroh ban kren la ki pdiang ne em ia ka jingtyrwa bala wanrah da ka Advisory Committee” ula ong. “Nga la kylli bunsien la ki pdiang ne em. Lada ki pdiang ia kane ka jingtyrwa, ngan sa pynbeit ia ka kynhun ban iakynduh ia u Myntri Rangbah” ula iathuh.
“Hynrei uwei hadien uwei, ha ka jaka ban kren shai la ki pdiang ne em, kila sdang man ban thombor. Hadien ba san ngut kila ai jingkren, Ngan leh aiu shuh ma nga? Kumta nga la kyrpad ia ki ban ai ia ka rai la ki pdiang ne em ia ka jingtyrwa ban thung ia ka Expert Committee, hynrei ka jingmut jingpyrkhat jong ki ka long beit tang ban thaw jingkulmar. Uwei hadien uwei kila sdang ban iahylla, bad dei na kata ka daw Nga la pynwai noh ia ka jingiaang bad mih noh” ula ong.
U Bah Sanbor ula pynpaw ba kane ka kam mynta kan shong beit noh ha ka Sorkar.
“Kum u MLA, Nga la pynlong ia ka jingialang bad buh ia kane ka jingtyrwa na ka Advisory Committee jong ngi hakhmat jong ki, hynrei kim shym la shah skhot bad kim shym la pdiang ia ka jingtyrwa jong nga kum u MLA, kumta, ka rai mynta ka shong ha ka Sorkar” ula ong.
