Shillong, Naitung 8 : Ka Khasi Hills Autonomous District Council (KHADC) kam shym la ioh pdiang satia ia kano kano ka bhah khajna na ka sorkar jylla kaba iadei bad ki marpoh khyndew (minor mineral) jong u snem 2019 -2020 bad ruh na u major mineral ba dei jong u snem 2020-2021.
Ia kane la pyntip da u EM in-charge ka tnad Pla Tyngka jong ka Council, Bah Gigur Myrthong da kaba ong ba ka daw ba kim ioh pdiang ia kano kano ka khajna kadei namar ka khlam COVID.
Haba jubab halor ka jingkylli ba wnarah da u MDC ka Mylliem, Bah Ronnie V Lyngdoh haba iadei bad ka bhah na ki marpoh khyndew ba ka Council ka ioh na ki marpohkhyndew naduh u snem 2019 haduh u 2023, u Bah Gigur u lapyntip ba ha ka snem 2019 – 2022 ka Council ka ioh pdaing haduh 1.90 klur tyngka na ki major mineral ha u 2020 – 2021 bad 26.13 klur tyngka na ki minor mineral.
La iathuh ruh ba ha u snem 2021-2022 ka Council ka la ioh pdiang ruh ka bhah khajna kaba 21.83 klur tyngka na ki major mineral bad 20 klur tyngka na ki minor mineral.
Halor ka jingkyllli jong u Bah Ronnie ba kiei ki sienjam ba ka Council ka la shim ban pyntikna siew ia ka khajna da ka sorkar jylla, u EM u la ong ba ka EC ka la thoh sha ka sorkar jylla ban pyllait noh ia ki jingthoh kiba iadei bad ka bhah khajna kaba ki dei ban ioh na ka sorkar jylla.
