Shillong, Risaw 26 : U Myntri Rangbah ka Jylla Conrad K Sangma ula kular ban sa shong bishar ia ka jingdawa ban kyntiew kyrdan noh ia ka Sohra Civil Sub-Division sha ka District ba pura hashuwa ban shim ia ka rai ba khatduh halor kane ka kam.
U Myntri Rangbah ula kular ia kane sha ka kynhun jong ka Sohra District Demand Forum (SDDF) ha ka jingialang ba long hynne ka sngi balang.
“Ka jingialang ka dei kaba biang namar u Myntri Rangbah ula kular ban shimkhia ha kaban khmih ia ka jingdawa jong ngi mynta ka kynti . Un sa phah ia kane ka kam sha u Chief Secretary ka Jylla ban pynsdang ia ka jingbishar ia baroh ki kam ki jam kynthup ia ki kot ki sla ba ngi la aiti sha ka Sorkar” ong u Bah John W Thabah, Secretary ka SDDF haba iakren bad ki nongthoh khubor.
Ka kynhun kala aiti ruh ia ka shithi pynkynmaw sha u Myntri Rangbah kaba ong ba ka jingdawa kyntiew kyrdan ia ka Sohra Civil Sub-Division sha ka District ba pura kala ioh ia ka jingkyrshan na kiba bun ki briew jong ki Shnong kiba hap hapoh ka Sohra bad Shella Constituency.
“Naba ka Jylla kala kynnoh ia ka 50 snem ka jingioh Jylla la ka jong ha u 2022, kan iahap bha ba ka Sohra Civil Sub-Division kaba dei kawei na ki Civil Sub Division kaba rim bha ha ka Jylla kan ioh ia ka jingithuh noh da kaba kyntiew kyrdan sha ka District ba pura da ka jingthmu ban wanrah ia ka synshar khadar shajan u paidbah bad ruh ban pynthikna b aka thain kan kiew ha baroh ki liang” ong ka shithi.
Ka Forum kala tyrwa ruh ba kane ka District thymmai kan iai neh ha ka kyrteng “Sohra”, ka jaka kaba la tip ha satlak ka pyrthei kum ka jaka ba jur slap tam ha pyrthei bad kaba la bna nam halor ka jingdon ia ki jaka jngohkai.
U Bah John ula ong ba ka Sorkar Jylla ka dang pyrshang ban pynbeit ia ki katto katne ki kam haba iadei bad ki jingdawa ha kine ki khyndiat sngi ban wan.
Haba kylli, ula ong ba ki don palat 200 tylli ki shnong kiban hap ha kane ka District ba thymmai. Hynrei, ki don 3-4 tylli ki Shnong ki bym kwah namar ka jingbym iahap ka rukom long ki jaka bad kiwei kiwei ki daw.
“U Myntri Rangbah ula kuklar ba u Chief Secretary un sa pynbeit ia ki kam ki jam ha kine ki sngi ban wan. Ula ong ba un sa khot biang ia ngi sa shisien hadien ba ka Sorkar kala dep shong bishar ia kine ki kam” pyntip u Bah John.
Haba kylli la ka Sorkar ka don jingthmu ban pynkha ia ka Sohra District hashuwa ka elekshon MLA 2023, une u Nongialam ka SDDF ula ong “Kane kan shong ha ka Sorkar namar ngi khlem buh satia ia ka por hynrei u Myntri Rangbah ula kular b aka Sorkar kan pynthikna ha kaban pyndep noh ia ki kam ki jam kham kloi katba lah”.
Haba pynpaw ba kane ka jingdawa ka dei kaba la sahteng mynta ka palat 15-20 snem, u Bah John ula ong “Khlem pep ka dei kaba la slem bha hynrei ngi long kiba iai shah, ngim kwah ban pynbor than ia ka Sorkar hynrei ngi pyrshang ban iaid da ka lynti kaba dei”.
Ula ong ba ka Sohra ka dei ka Sub Division kaba la rim tam bad bun ki Sub Division bala rim ha Meghalaya ki dei kiba la dep kyntiew kyrdan sha ka District hynrei ka Sohra kala iai sah kumba ka long haduh mynta.
Haba iakren bad u Myntri Rangbah, ula pyntip ba ula kular ia ka kynhun na Sohra ba ka Sorkar kan sa nang pyntyllun shakhmat ia ka jingdawa kaba la iakren.
“Nga la bthah ia u Chief Secretary ba un shong bishar biang sa shisien ia kane ka kam bad ban khot ia ka Committee (SDDF) lada donkam bad ban iakren ruh ia kiwei kiwei ki kynhun kiba iadon bynta ha ka jingdawa ia kane ka district bad hadien ba ngi la dep ban iakren ia baroh, ngin sa rai kumno ban iaid shakhmat” ula ong.
U Conrad ula ong ba ia mynta, ki don bun ki kam kiba hap ban khmih bad ki don ruh ki jyrwit jyrwat na kiwei kiwei ki liang . “Namar kata, nga sngew ba ka long kaba donkam ban iakren ia baroh kine kiei kiei shuwa ban shim ia ka rai kaba khatduh” ula ong haba bynrap “Ka sienjam ban bud ka long ba ngin khot ia ka kynhun bad ki dkhot bad ngin sa kyntu ia u Chief Secretary bad ka Tnad ba dei khmih ban iakren bad iasyllok ia kaei kaba dei ban leh”.
Haba kylli, u Myntr Rangbah ula ong ba ki don katto katne ki jingtynjuh halor kane ka jingdawa District ka Sohra kaba dei ruh ka daw ba ka Sorkar kam lah ban pyntyllun shakhmat ia ka kam. “Ta ka daw, ka jingiakren ka dei kaba donkam ban hap pynlong”.
