Shillong, Nailur 29 : Haba pynkut syndon ia ki khubor antad halor ki jingiakynad hapoh ka kynhun synrop ba synshar ia ka Jylla, u nongialam ka BJP bad Myntri Sorkar Bah Sanbor Shullai ha ka sngi Ba-ar ula ong ba ka jingiatreilang hapdeng ka NPP-BJP hapoh ka NDA ka dang skhem triang bad ki khubor ba ki MLA ka NPP ki thmu iasoh sha ka BJP ka dei kaba lamler.
U Bah Sanbor uba dei u nongialam ka BJP Legislature Party ha Meghalaya, ula onng ba ula ioh ia ka khubor kaba shai na ki nongialam ka BJP na Delhi halor kane ka kam.
“Kumba la pynthikna da ki nongialam na Delhi, ka jingiatreilang ka BJP-NPP ka dang skhem bha. Ki nongialam na Delhi kila pynshai ba kam shym don satia kano kano ka jingiakren ban wan iasoh ki MLA ka NPP bad ba ki kmen bha ia ka Sorkar ba ialam u Conrad Sangma ha Jylla” ong u bah Sanbor.
Ula pyntip ba ka jingiatreilang ka dei kaba khlain bha la ha ka Sorkar Pdeng ne ha ka Jylla.
“Naba ka NPP bad ka BJP ki iatreilang ha ka Sorkar Pdeng, kiei kiei baroh ki biang lut hapdeng kine ki ar party” ula pynpaw.
Haba iaroh ia u Myntri Rangbah Conrad K Sangma, u Bah Sanbor ula ong “U CM jong ngi u dei uba stad bad ula shimkhia bha ia ka constituency jong ngi”.
Ula pyntip ruh ba ki MLA ka BJP kin sa iakynduh shen ia u Myntri Rangbah ban pan ia ka jingkyrshan na ka bynta ka constituency jong ki, kaba long kat kum ka jingbthah jong ki nongialam na Delhi.
Haba niew kamkai ia ki khubor hamsaia ba saphriang ha ki lad pathai khubor bad ki social media halor ka jingthmu iasoh BJP ki MLA ka NPP, u Bah Sanbor ula ong “baroh ki khubor ha ki lad pathai khubor bad ki social media ki dei kiba shu thok. Kam shym don satia kano kano ka jingiakren bad ki MLA ka BJP”.
Ula maham ba ym don mano mano ruh na ki nongialam ha Jylla kiba la iohbor ban pynlong ia kum kane ka jingiakren.
