Itanagar, Risaw 25 : Ka kynhun kieng atiar ba la shah khein beain ka Revolutionary People’s Front (RPF), kala shim ka jingkitkhlieh ha kaba iadei bad ka jinghap jong ka liengsuin helicopter jong ka tnat shipai Indian Army ha Arunachal Pradesh ha ka 21 tarik mynta u bnai.
Ka RPF kala ong ba ki dkhot na ka tnat Manipur Naga People’s Front bad ka People’s Liberation Army (PLA), kiba dei na ka tnat shipai ka RPF kila siat pynhap ia ka liengsuin helicopter jong ka tnat shipai Indian Army hapoh Arunachal Pradesh da kaba pyndonkam da ka tiar siat RPG bad mortar.
“Ia ka lynti iaid jong kane ki liengsuin Rudra Advanced Light Helicopter bala shna ha India la sakhi naduh kine ki ar sngi ba la dep da ki dkhot ki jong ngi kiba la siat pynhap noh ia ka ha ka por kumba 10 baje mynstep, kata hadien ba kane ka liengsuin kala wan poi ha ka jaka kaba kitei ki dkhot jong ka kynhun kila pynap da ki tiar siat RPG bad mortar kaba wanrah ruh ka jingiap ia ki heh shipai,” ong ka RPF.
Nalor kata ka RPF kala dawa ruh na ka sorkar pdieng ba kan weng noh ia ki bor shipai jong ka ri na ka jylla Manipur, Nagaland, Assam, Arunachal Pradesh, Punjab bad Jammu & Kashmir.
Kane ka kynhun kieng atiar kala maham ruh ba kan dang iai bteng ban pynlong ki jingthombor pyrshah ia ki bor shipai lada ka sorkar kam weng noh ia ki.Kane ka jingpynpaw jong ka kynhun RPF kala saphriang ruh lyngba ki social media.
Watla katta na ka liang ka lad pathai khubor kam lah satia ban pynthikna halor ki jingshisha ha kaba iadei bad kane ka jingkam ia kaba la ong ba kala wan lyngba ka kynhun RPF.
Kham hashwa ka Revolutionary People’s Front (RPF) kala shim ruh ka jingkitkhlieh ha kaba iadei bad ka jingthombor ia ka kynhun ki kali shipai ka Assam Rifles ha Manipur kaba la shim ia ka jingim jong ki san ngut ki shipai kaba kynthup ia u Viplav Tripathi uba dei u heh shipai uba ha ka kyrdan commanding officer jong ka 46 Assam Rifles, ka kurim jong u bad u khun ba dang phra snem jong u.
Ha ka 21 tarik mynta u bnai ka liengsuin Rudra advanced light helicopter (ALH) jong ka tnat shipai Indian Army ha ryngkat ki dkhot ka tnat shipai kaba kynthup ia arngut ki pilot kala hap noh hapoh ka jaka lum ba long riat ha ka shnong Migging ha Upper Siang district ka Arunachal Pradesh.Baroh kine ki san ngut ki shipai kila khlad noh ha kane ka jingjia.
Kane ka jaka bala jia ka jinghap liengsuin la tip kum ka Singging kaba hajan khappud ka India bad China hapoh Arunachal Pradesh.Ka jingthut hapoh ka liengsuin la suba ba ka dei ka daw kaba la pynlong ia kane ka helicopter ba kan hap.
Kine ki san ngut ki dkhot jong ka tnat shipai ka Indian Army kiba la khlad ha kane ka jinghap liengsuin ha Arunachal ki kynthup ia u Major Mustafa Bohara (27), Major Vikas Bhambu (27), Sepoy Rohitash Kumar (33 snem rta) bad u Craftsman (Engine Technician) u KV Ashwin bad u Havildar Brijesh Sinha kiba dei na Assam.
U Major Mustafa Bohara bad u Major Vikas Bhambu ki dei ki pilot jong kane ka liengsuin helicopter.
