Guwahati, Risaw 25 : Uwei u samla napoh Assam ula khlad kyndit na ka jingpang klongsnam katba u dang peit ia ka jingialehkai kriket ICC T 20 world cup hapdeng ka India bad ka Pakistan ha ka sngi U Blei ba la lah.
Kane ka jingjia la ong ba kala jia hapoh Sivasagar district ka Assam.Ia une u briew la tip kyrteng kum u Bitu Gogoi 34 snem rta.
Na ka liang ka tnat pulit ka Sivasagar district kala ong ba u Bitu Gogoi ula ngat ha ka jingshitom klongsnam katba u dang peitkai ia ka jingialehkai krimet T20 hapdeng ka India bad ka Pakistan hapoh ka cinema hall, kata ha kaba la pyni live ia kane ka jingialehkai.
Katba u dang peit ia kane ka jingialehkai, u Bitu Gogoi ula kyllon kynsan ha madan bad um tip briew shuh.
Na ka liang ki paralok jong u mardor kila pynkit ia u shapoh ka hospital ba marjan ha kaba na ka liang ki doktor kila pynbna ba ula dep khlad noh.
Katkum ki doktor la ong ba u Gogoi ula ngat kynsan ha ka jingshitom kyndeh klongsnam namar ka jingjur palat ka jingsawa hapoh ka cinema hall ha ka por ba ki dang peitkai ia katei ka jingialehkai kriket.
Ha kawei pat ka bynta na ka liang ki bor pulit ha Sivasagar district ka Assam kila pynlong ia ka jingtohkit halor kane ka jingjia.
Katkum ka jingiathuh da kiba haiing hasem la ong ba u Bitu u dei u briew uba shait ba khlain bad um shym la don satia ia kano kano ka jingshitom.
