Shillong, Risaw 19: Ka Iingkashari Meghalaya High Court hynne ka sngi Balang kala bthah ia ka Sorkar Assam ban file ia ka affidavit halor ka jingtohkit ba iadei bad ka jingkynnoh ba khaii tuh ia u dewiong ba tih beain na Meghalada da kaba shim ia ki kot ki sla ba shna thok ha Jylla Assam.
Ia kane ka hukum la pynmih halor ka jingkynnoh jong u Nongmudui-Champer M Sangma bad Maikel T Sangma, ba u dewiong bala tih beain na Meghalaya la khaii tuh sha Assam bad pyniaid biang sha Jylla, ban khaii sha Bangladesh, da kaba shim ia ki kot ki sla ba shna tuh ha Assam.
Kine baro arngut ki nongmudui kila ujor ia ka PIL ba kyrpad ia ka Iingkashari ban tuklar halor kane ka kam.
“La kyrpad ia ka Jylla Assam ban file affidavit hadien ka jingpynlong ia ka jingtohkit la ka don nongrim ne em kano ka jing kynnoh jong ki Nongmudui kumba la kdew haneng. Ai ba kane ka kam kan wan phai biang sha ka jingbishar hadien lai taiew ban ap ia ka aafidavit lane ka kaiphod jong ka Jylla Assam. BUh ia kane ka kam ban bishar biang ha ka 14 tarik u Naiwieng, 2022” ong ka Division Bench ha ka hukum.
Ka hukum ka ong ba la ka Sorkar Jylla kala aiti ia ka kaiphid ba kala pynlong ia ka jingtohkit Magistrate haba iadei bad kane ka kam, ha kaba la lap ia ki sakhi satar iaka jingsiew jong ka GST ia u dewiong kiba don bad ki kot ki sla.
Kala ong ba ka Jylla kala pyntop ba halor ka jingpyni ia ki kot ki sla bala siew ia ka GST, ka Jyla kam sngew donkam shuh ban dang tohkit ia ka jingshongsain kane ka jingkhaii ia u dewiong.
“Namar kane, ka Jylla Assam ka dei ban ai ia ka jingiarap ban pynshisha ia ki kot ki sla bala siew ia ka GST” ong ka hukum.
Lah ban kdew hangne ba ka sorkar Assam kala pyntip ba kala dep register ia ki katto katne ki case halor ka jingkhaii tuh ia u dewiong bad ka Iingkashari ka dang ap ban ioh ia ki jingtip ba bniah halor kane ka kam.
