Nongpoh, Risaw 19: Uwei u rangbah uba la tip kyrteng kum u Sharlestin Kurbah, na ka shnong Laiphew Diengngan, ka shnong kaba don ha ki thain Mawhati, u la ioh ban pyllait im ia uwei u mrad ba ju im ha khlaw bad uba la ju tip kum u Slow Loris.
Katkum ka jingiathuh da utei u rangbah, la ong ba ka jinglah jong u ban pyllait im, ka dei hadien ba u la lap ba ki la don ki briew kiba la ioh ia utei u mrad bad kiba la thmu ban pyniap ne bamdoh noh ia u, hynrei haba u la iohi ia kata, u la pyrshang ban thied noh ia utei u mrad ha ka dor kaba 500, hynrei kitei kiba la ioh ia utei u mrad, ki la kyntait ban ai ha ka dor kaba T. 500.
Utei u rangbah, uba dei ruh uba ieid ia ki mrad khlaw, u la ong ba haba kim ai ha ka dor kaba T. 500, u la pan noh ha ka dor kaba T. 1000, kaba la pynlong ia kitei ki briew kiba la ioh ia utei u mrad ba kin ai bad ula ioh ban pyllait im ia utei u mrad.
Utei u rangbah u la pyntip noh sha ki briew ka tnat Wildlife ba kin wan shimnoh ia utei u mrad bad ba kin leit buh noh sha ka jaka ba don ki mrad.
