Nongpoh, Rise 19: Ka kynhun ialehkai football jong ka Umrit Sport Club ka la ioh ban khur ia ka nam jop kaba nyngkong eh ha sngi ba plie pyrda ia ka MLA Cup Football Tournament kaba la pyniaid da ka National People’s Youth Front Party (NPPYF), Jirang Konstituensi.
Ia kane ka lympung ialehkai la plie mynta ka sngi da u MLA ka thain Bah Sosthenes Sohtun, kaba la pynlong ha ka madan ialehkai jong ka Western Ri Bhoi Sport Association ha Patharkhmah.
Kane ka namjop ka la leit sha ka kynhun jong ka Umrit Sc da ka jinglah ban pynliem ia ka kynhun ialehkai jong ka Patharkhmah Sc da 4-2 kol hadien ba ka jingiakhun kaba la iakhaid bha ka la poi sha ka jingiashut ia ka tie breaker.
Haba ai jingkren, u Bah Sohtun u la ai khublei ia ki nongkitkam ka NPPYF Jirang Konstituensi kiba lah ban shimkhia ban wanrah ia kum kane ka lympung na ka bynta ki khun samla kiba donsap hapoh ka Konstituensi ba kin iohlad ban sei ia la ka sap ka phong ha ka kam ialehkai football bad ruh ban kiew ha kane ka kam ialehkai sport.
U la ong ruh, ba kane ka lympung kan iarap ha ka rat dyngkhong ia ki jingsniew kiba lah ban ktah ia ki khun saml, naduh ka jingdih buaid kiad bad ruh na u drok.
Na ka liang ka NPPYF Jirang Konstituensi, ka la pynkhreh ruh ia ka song pisa kaba 1 lak tyngka na ka bynta ka kynhun lahduh bad 50 hajar tyngka ia ka kynhun kaba wan ha ka kyrdan ba-ar ha ryngkat ki trophies bad kiwei kiwei ki khusnam shimet ha kane ka lympung ialehkai football.
Kiba iadonlang ha kane ka sngi ki kynthup ia u Bah Victor Rani, MDC ki nongkitkam ka NPPYF kiba kynthup ia u Bah Markur Lapasam President Jirang block, u Eratus Nongsiej Vice President NPYF State Meghalaya, u Pyndaplang Wahlang President NPYF Ri Bhoi District nalor kiwei kiwei.
