Shillong, Nailur 30: Ka jingiakajia halor ka jingsiew bai lutksan na ka bynta ka skul kaba la julor ha ka por ba shna ia ka surok Shillong-Dawki ka dei kaba lah dep ban pynbeit hadien ba la pyndep ia ka jingjurip lang, ha kaba ka Meghalaya High Court kala rekod ia katei ka jingpynbeit thymmai kaba long T.90.84 Lak pyrshah ia ka jingai jingkhein mynshwa da ka PWD kaba long T1.70 Klur.
Ka High Court haba tian bishar ia ka PIL, haba ka NHIDCL lyngba ka DSGI Dr N Mozika, kala iatai sani halor katei ka jingai jingkhein jong ka PWD, da kaba ong, ba kadei kaba la heh palat bad wat ki jaka kim dei satia kiba la shah pynjulor na ka jingshna ia ka surok.
Haba buddien ia ka hukum kaba la pynmih ha ka 7 tarik u Nailur 2026, ka iingbishar kala bthah ia u nongmihkhmat ba rangbah jongka NHIDCL ryngkat bad ki heh ophisar ka PWD bad u Deputy Commissioner, East Khasi Hills, ban pynlong ia ka jingjurip lang bad ban aiti ia ka jinglap kaba thymmai jong ka jingkhmih bniah, da kaba pynpaw shai ba dei tang ka jingtei kaba la julor na ka jingshna ia ka sorkar kadei kaba la kynthup.
Ha ka sngi Baar, ka NHIDCL kala aiti ia ka kaiphod ha ka 29 tarik u Nailur 2026 hakhmat jongka Division Bench jongka Chief Justice ka Revati Mohite Dere bad u Justice W Diengdoh.
Ka kaiphod ha ka sla kaba 32 kala kdew ba ka jingkhmih bniah biang hadien ba la pyndep ia ka jingjurip lang kaba la pynlong ha ka 27 tarik u Nailar 2026 kadei T.90,84,102 bad kam dei T.1,70,73,223 kumba la kdew nyngkong.
U Dr Mozika ula ong ban aiti ia katei ka jingsiew da kaba thep noh mardor bad ki bor kiba dei khmih.
Ka iingbishar kala ong ba ka khmih lynti ba shisien ba ka NHIDCL kala thep ia katei ka pisa, ki bor kiba dei khmih kin sa shim ia ki sienjam kiba donkam ban maramot ne shna ia ka skul bad kiwei ki jingtei kiba la shah ktah da kaba trei bha ruh ia ka kam.
U nongiasaid aiñ ula pyntip ruh ia ka iingbishar ba ka surok Shillong-Dawki mynta kadei kaba treikam 24×7 bad ba ka jaka kaba twa khyndew bad ka surok shnong kaba ki kali ki iaid lyngba kadei kaba la maramot.
Ka iingbishar kala buh Tarik ba kan shong tian bishar biang ia kane ka mukotduma ha ka 13 tarik u Risaw.
