Shillong, Risaw 29: Ka Shillong Cherry Blossom Festival kan wanphai biang ha ka 20-21 tarik u Naiwieng ha kaba yn wan pynbyrngia da ki kynhun nabar ri ban rakhe ia ka tem ka put hapdeng ki rta ki bapher bapher, ka nongpynmih ia kane ka tamasa ka Rockski EMG kala iaroh ia ka sorkar Meghalaya halor ka jinglah ban pynlong ia kane ka tamasa ka tem ka put kum kaba bat ia ka kyrdan kaba nyngkong ha ka ri India bad kum kawei ruh kaba lah ban pynpaw nam ia ka jylla.
Ki nongpyniaid kila ong ba kane ka tamasa kala kiew sted ha ka jingseisoh ia ka jylla, da ka jingai jingithuh ka sorkar ia ka tem ka put bad ia ka kolshor kum ki nongpyniaid shakhmat ia ka kam jngohkai bad thaw ia ka rynsan kaba wanrah ia ki nongrwai bad ki kynhun tem na kylleng ki ri hapoh ka nongbah Shillong, kaba la khring ia ki nongwankai na kylleng ka ri India bad na kiwei kiwei ki ri bad kane kala pynskhem ba ka Meghalaya ha ka jingiakren ha ki rynsan tamasa ha kylleng ki ri.
Kila ong ba ka jingnoh synniang ka sorkar kala long palat ban ia kane ka tamasa, ban tei ia ki jingtei kiba neh shirta ha ka kam jngohkai kiba thaw ia ki kabu na ka bynta ki nongtem bad nongrwai kiba dei ki trai jylla, ki kam khaii pateng ha ka jingpynbiang ia ki jaka sah, ki nongsengkam lajong bad ki samla bad ka pynpaw ba kala ioh ia ka nam ‘Music Festival of the Year’ ha ka EEMAX Global ha u snem 2025 kaba long ka dak kaba kongsan jong u mawjam ha ka jingiaid lynti.
Haba pynbna na ka bynta ka prokram mynta ka snem, ki nongpyniaid kila ong, ba ha u snem 2026 kan don ka International Music Summit ha ka 19 tarik u Naiwieng da kaba iatreilang bad ka India International Music Week, kaban pynleit jingmut ha kaban pyniasoh ia ka sap ka phong ka jylla Meghalaya bad ka pyrthei.
Yn khot sngewbha ia kiba donbynta ha kaban kyntiew ia ka tamasa, kiba pyniaid ia ki jingdie ne Booking Agents, Record Labels bad ki riewshemphang na ki kompani na kylleng ka pyrthei ban ioh ia ka jingshemphang halor ka jylla Meghalaya, kan don ruh ka jingiatai nia, jingialang bad ki jingiasyllok bad ki nongrwai bad kynhun tem jongka Meghalaya Grassroots Music Project.
Kane ka summit kan dei kaba plie ia baroh ki nongtem bad nongrwai na ka jylla Meghalaya.
Ha kane ka kynti kaba mynta, yn sdang ruh ia ka Cherry Blossom FIT CHECK, Fashion bad Self-Expression Competition ha kaba ka jingai khusnam ia baroh kan kot ia ka T.20 lak, ha kaba kan don ruh ka jingiashimbynta ‘Online’ bad kiba wan mihkhmat hi dalade ha ka rynsan iakob bad ia ki nongjop un sa pynbna ha ka rynsan kaba kongsan, nalor kane kan don ruh ka Red Bull Fan Zone, MMA, Armwrestling, Cosplay bad kiwei kwiei.
Ki nongpyniaid kila ong, haba ka Cherry Blossom kan rung sha kawei pat ka lynnong, ha une u snem 2026 kaba la tei lyngba ka jingkyrshan ka sorkar, kan pynkhlain ia ka jinglong jong ka kam jngohkai ha Meghalaya, thaw ia ki lad na ka bynta ki briew jongka bad ban pdiang ia ka pyrthei sha Shillong.
