Nongstoiñ, Risaw 29: Ka Lyngngam Presbyterian College Mawthengkut ha ka sngi Palei, kala rakhe ïa ka College Foundation Day kaba shiphew bad kumjuh ïa ka graduation day kaba saw ha ka jingïalang kaba la long ha phyllaw jong ka College hapoh ka shnong Nongkyna, Mawshynrut Civil Sub Division.
La pynshong kun ia kane ka jingrakhe da u MDC ka thaiñ u Bah Srally Rashir kum u kongsan, ha ryngkat ka jingïadonlang ruh u bah Miki Pohsna SDO ka Mawshynrut Civil Sub Division kum u symbud kongsan, u Dr. B.L Peiñlang Principal, ki Pastor, ki nonghikai, ki samla pule bad kiwei kiwei.
Haba ai jingkren, u Bah S. Rashir u la ong kane ka juk kaba mynta ka dei ka juk kaba kyrduh kam bad kaba la eh ruh ban ïoh kam namar ka jingpass ki samla pule ha ki kyrdan bapher bapher manla u snem ka nang bun. Hynrei, u la ong pat ba kato ka syrnod kaba ki samla pule ki ïoh ha kane ka sngi, ka la long lypa kum ka jingïada na ka bynta ka lawei ka jong ki.
U la ai mynsiem ïa ki samla pule kyrpang eh ba kin nang trei shitom bad ban aiti ïalade ha ki kot pule ba kin nang lah ban kiew shakhmat ha ki liang baroh. U la kyrkhu kyrdoh ruh ïa ka College bad ki nonghikai ba kin nang jam shakhmat ban tbeh ïa ka jingshai lyngba ka jingnang jingstad sha ka thaiñ baroh kawei.
U Bah Miki Pohsna SDO ka Mawshynrut Civil Sub Division, u la ong ïa ki samla pule kiba la pyndep ïa ka BA na katei ka College, ki dei ban puson bad pynshong nongrim bha aiu kin leh nangne shakhmat haba ki la pass ïa ka BA.
Ha kane ka sngi na ka liang jong ka College kala ïoh ruh ban pynkup burom bad ai syrnod sha ki samla pule kiba la pyndep ïa ka jingpule BA na katei ka College.
