Ka jingkamai ki trok ka lah ban kiew sha ka shiphew shah : DyCM
Shillong, Risaw 29 : Ka Meghalaya kala pan shuh shuh ia ki Land Custom Station bad ki Border Haat ha ki jaka khappud ka Bangladesh ban nang pynkhlain ia ka khaii ka pateng bad ka lad aikam iajam.
Ia kane la pyntip da u Symbud Myntri Rangbah Bah Sniawbhalang Dhar haba pyntip ba kane kan iarap ban kyntiew sha ka shiphew shah ha ka jingiaid kamai ki trok lada pynkhlain ia ki jingtei.
Haba kren halor ka jingiaid ka jingtyrwa ia ki LCS, u Bah Sniawbha ula ong “Katto katne tylli lah dep ban ioh ia ka mang tyngka hynrei ki kam kim pat sdang satia bad ka Umkiang bad Pyrdiwah ki dei ki jingtyrwa ba thymmai…katto katne ki kam kila iaid katba katto katne ki dei ki ban dang shim rai”.
Ula iathuh ba ki project ha khappud ki donkam ia ka jingiatreilang bad ka Bangladesh.
“Ka jingeh ka long ba kine ki dei ki jaka khappud bad kiwei ki ri. Don ki por ba ngi la long kiba kloi, hynrei ki pat kim pat kloi. Kum ka nuksa, ngi la jied ia ka Umkieng hynrei ka Bangladesh kam pat long kaba kloi. Kumta, ngi la iakynduh biang. Kane ka dei ka kam hapdeng ki Ri ym ba lah ban shim rai da ka Sorkar Meghalaya” ula ong.
Haba ainam ia ka MSME scheme ka Sorkar Pdeng bad ka jingpynkhlain ia ki jingtei ha ki khappud ban iarap ia ki nongpynmih mar ka thain, u Bah Sniawbha ula ong “Ngi don shibun ki mar ban khaii sha Bangladesh hynrei don ki khep ba ngim don satia ia ka jaka ban khaii. Mynta da ka jingkyrshan ka Sorkar India bad ka Sorkar Meghalaya haba iadei bad ki Border Haat bad ki surok, ka khaii ka pateng kala nang kiew, hynrei ngi donkam khambun”.
U iathuh ba ka Sorkar kan sa phah shuh shuh ia ki jingtyrwa na ka bynta ki LCS bad ki Border Haat ban lah kyntiew ia ka kam khaii mawshun, dewiong bad kiwei ki mar ba pynmih na Jylla.
“Kan plie bun shah ia ka lad iohkam iohjam nalor ki MSME lyngba ka khaii pateng. Ha ka jaka 1000 trok shisngi, kan kiew sha ka 10,000 trok shisngi bad kane kan kyntiew ia baroh naduh ka khajna ka Sorkar sha ka iohkam iohkam” ong u bah Sniawbha
