Shillong, Risaw 19 : U MLA ka Mawkyrwat Bah Renikton Lyngdoh Tongkhar ha ka sngi Nyngkong ula iathuh ba ula leit iasoh sha ka National People’s Party (NPP) namar ki briew jong u ki kwah ia kata bad u itynnad ruh ia ka jingtreikam ka Sorkar MDA.
U Bah Renikton, uba sdang kum u MLA ka HSPDP bad hadien iasoh sha ka UDP da ka jingthmu ban wanrah ia ka jingiatylli ki seng riewlum, ula aiti ia ki kot ki sla ban iasoh NPP ha ryngkat u MLA ka West Shillong Bah Paul Lyngdoh bad u MLA ka Mookaiaw Bah Nujorki Sungoh, hakhmat u Lamphang ka Iingdorbar Thaw Ain Thomas A Sangma.
Haba kren sha ki nongthoh khubor, ula ong “Lada nga lah ban ong tang shi lain, ka jingtreikam jong kane ka Sorkar- MDA-I bad MDA-II- kala pynlong ia nga ban shim ia kane ka rai. Ym tang ma nga marwei, hynrei ki briew jong nga ruh kumjuh. Phin sngewtynnad ban tip ba Nga la leh ia kane hadien ba ki briew jong nga kila shim ia ka rai. Kumba phi la iohi, kiba bun ki paidbah ka Mawkyrwat kila leit iasoh sha NPP”.
“Kum u nongialam uba ngeit ba Nga donkam ia ki nongbud, Ngan bud khang ba kin bud ia nga” ula bynrap.
Haba pynkynmaw ia ki jingpyrshang jong u ban wanrah ia ka jingiatylli ki seng riewlum, u Bah Renikton ula ong “Ngi la pyrshang bad leh kat kaba lah ban pyniatylli ia ki seng riewlum. Phi ruh phi iakynmaw bha, ha katei ka por ha ka kyrteng ka RDA, ngi la pyrshang kat kaba lah, hynrei phi la iohi ruh ba ngi la shah rem”.
“Ta ka daw ngi la iohi ba lada ngi kwah shisha ban pynkhlain ia ka seng sain pyrthei jong nga, kaba ialam da ki briew jong ngi, ka lynti bad ka kabu kaba don ka dei ka NPP. Nga sngew sarong ban ong ba ka NPP ka dei ka National party kaba la ithuh hapoh ka ri baroh kawei, hynrei la ialam ia ka da ki briew jong ngi nangne bad nga sngew sarong bha ia kane” ula ong.
