Shillong, Risaw 19 : Ka United Democratic Party (UDP) ha ka sngi Nyngkong, kala phah ia ka shithi ba pyntip bala beh seng ia ki lai ngut ki MLA hadien ka jingbna khubor ba kin leit pyniasoh ialade sha ka National People’s Party (NPP).
Kane ka shithi beh seng bala soi tang da u President ka UDP marwei Bah Metbah Lyngdoh, la phah sha u Bah Paul Lyngdoh, Bah Renikton Lyngdoh Tongkhar bad u Bah Nujorki Sungoh.
Kat kum ka shithi, u Bah Metbah ula pynpaw ba kumba la paw na ki lad pathai khubor, kala long shai ba phi baroh phin sa iasoh sha ka National People’s Party (NPP), kumta, da ka bor bala pynkup ha nga kum u President ka United Democratic Party (UDP), Nga beh noh ia phi lai ngut na ka jinglong dkhot jong ka Party, naduh mynta ka sngi ka 19 tarik Risaw.
Lah ban kdew hangne ba ka UDP kaba don 12 ngut ki MLA hadien ka elekshon 2023, kala sah mynta satang uwei u MLA, uba dei u President ka Party Bah Metbah Lyngdoh, uba bat ruh ia ka shuki Myntri ha ka Sorkar MDA-II.
Phra ngut na ki MLA ka UDP kila leit iasoh sha ka Bharatiya Janata Party (BJP) ha u bnai Nailur bad mynta sa lai ngut kila leit iasoh sha ka NPP.
Kane ka jingbeh seng ka thmu ban jop ia ki jingduna kiba don hapoh ka ain kyntiap seng (anti-defection act).
Hapoh ka Tenth Schedule, lada ia ki dkhot la beh seng, kim shah khring shuh ha ka jingmait kyrteng ia ka jinglong MLA halor ka nongrim ka jingphet seng, hynrei ia ka jingkam iasoh jong ngi lah ban tynjuh kat kum ka ain bad ki duh noh ban long ki dkhot jong ka party ba ki don hashuwa ka jingiasoh.
