Imphal, Risaw 19: Kumba arngut ki shynrang, ki la iap bad 8 ngut kiwei pat, ki la mynsaw, ha ka jing thombor jong ki kynhun kaikhlaw, hajan ka shnong Hongman, kaba hap ha Kangpokpi district, ha ka step sngi Nyngkong.
Ha kawei pat ka khubor, ki nongshong shnong kiba la bitar lep ki la wanrah ïa ki metïap jong ki arngut kiba la khlad ha ka khyrdop jong ka ïing jong u Myntri Rangbah ka jylla u Yumnam Khemchand Singh ha ka janmiet jong ka sngi Nyngkong ban pynpaw pyrshah ïa ki jingshah pynïap.Hadien kata ki pulit ki la siat da ki tear gas ban pynpra ia ki paidbah.
Kitei ki arngut kiba la khlad ki dei kiba la tip kyrteng kum u Arubam Ronil, 35 snem ka rta, u khun jong u Raja Mama Memi na Nongshum Mayai Leikai bad u Lairenlakpam Inaobi, 51 snem ka rta, u khun jong u Tombi na Nongshum Awang Leikai.
Katkum ki tyllong khubor na ka thain la ong ba kine ki briew kiba la shah pyniap ki dei ki nongshong shnong jong ka shnong Nongshum kaba hap hapoh ka Khundrakpam constituency jong ka Imphal East district.La iathuh ba ki la leit sha kawei ka khlaw kaba don hajan Hongman, kaba la tip ruh ha katei ka jaka kum ka Hongman Khongbal, ban lum dieng thang haba ki la shah thang da ka ding.
La iathuh ba kitei ki arngut ki la iap ha katei ka jaka, katba ym duna ia ka 8 ngut kiwei pat ki la mynsaw na ki kuli bad ki la mynsaw ha katei ka jingshah thombor.
Kane ka jingjia ka la jia ha kawei ka khlaw kaba don hajan ka thaiñ Khamenlok, kaba la sakhi ïa ki jingïakynad kiba jur hapdeng ki ar jaitbynriew bad ki jingïakynad halor ki jaka ha ki por ba kham mynshuwa kaba dang ïaid shakhmat ha Manipur.Ka Hongman ka dei ka jaka sah jong ki Tangkhul Naga kaba don hajan u pud u sam bad ka shnong Nongshum ha Imphal East.
Ki sengbhalang ka thain ki la pynrem jur ia katei ka jingshah pyniap, da kaba batai ia katei ka jingjia kum ka jingshah thombor jong ki riew paidbah kiba lum dieng na ka bynta ki jingdonkam ba man ka sngi.
La iathuh ba ki bor pahara ki la don ha ka thain la nang pynkhlain shuh shuh khappud hapdeng ka Imphal East bad Kangpokpi district ban khanglad ia ka jingjur shuh shuh bad ban iarap ban sei ia ki lanot.
