Shillong, Risaw 19: Ka Sorkar Jylla kala pynbna (notify) ia ka Meghalaya Electric Vehicle Policy, 2026, kaba tyrwa ia ki lad jingiarap ha kaba iadei bad ka jingthied, road tax bad ka jingmap ia ka jingsiew ha ka ban rejistar bad ki jingmyntoi ha ka ban pynduh (scrappage) pynsted ia ka jingpyndonkam ia ki kali ki bym pynmih tdem.
Ka policy, kaban treikam na ka bynta 3 snem bad ka ban bujli noh ia ka Policy jong u snem 2021, kala wan ha ka por ba ka Jylla kala don kumba 6.53 lak tylli ki kali kiba lah rejistar kynthup ia ki 2,500 tylli ki kali elektrik haduh u bnai Jylliew 2026.
Hapoh kane ka policy, ki nongthied ki lah ban shim ia ki subsidy katkum ka jingkloi ka jongki ne kaba la tip kum ka “first-come, first-served basis”.
Na ka bynta ki thuk thuk elektrik lada ka dor thied na ki karkhana ka long T1.75 lak, ka lad jingiarap kaban ai ka long 2,000 tylli ia kiba pyndonkam shimet bad 2,000 kiba pyndonkam ha kaban kamai kajih.
Katba ia ki kali lai shaka kiba kynthup ia ki Auto bad kiba kit jingkit (goods carriers) kin ioh jingiarap 500 tylli.
Na ka bynta ki kali elektrik saw shaka, lada ka dor thied ka long T.35 lak, ki riewshimet kiba thied kin ioh jingiarap T.25,000 tang na ka bynta 3,000 tylli ki kali, katba ki kali ban kamai kin ioh T.50,000 na ka bynta haduh 3,000 tylli ki kali.
Baroh ki kali elektrik kiba lah rejistar ha ka por jong katei ka policy kin ioh ruh ia ka jinglait siew ia ka khajna kali bad ka bai rejistar ia ka kali kaban kynthup ia ki ar shaka, lai shaka, saw shaka bad ki bos elektrik.
Ka sorkar kala wanrah ruh ia ka ‘Scrappage Incentives’ na ka bynta ki trai kiba phah pynduh noh ia ki BS-IV bad ia ki kali kiba kham hashwa ha ki Centre kiba la ioh jingithuh.
Ka lad jingiarap ka long T.10,000 ia ki ar shaka (naka bynta ki 400 ngut kiba aplai kloi tam), T.25,000 ia ki lai shaka (50 ngut kiba aplai), T.50,000 na ka bynta ki kali saw shaka jong ki riewshimet (300 ngut kiba aplai) bad T.2 lak na ka bynta ki kali saw shaka kiba kamai (300 ngut kiba aplai).
Ka policy ka buh ruh ia ki lad ban tei ia ki steshon kaba ki kali kin ioh ban ‘Charge’ bad ban bujli ia ki ‘Battery’ ha kylleng ki bynta jong ka Jylla da kaba iatreilang bad ka MePDCL, Tourism, Urban Affairs, PWD bad kiwei kiwei ki Tnad Sorkar.
Ia ka jaka Sorkar lah ruh ban ai ‘Lease’ na ka bynta ban tei ia ki Charging Station na ka bynta ki paitbah, katba ia ki jingtyrwa yn pyniaid lyngba ka Single Window System ha ka Portal jong ka Invest Meghalaya.
Ki nongkynshew tyngka ki lah ban shim ia kitei lad jingmyntoi hapoh jong ka UNNATI 2024 bad MIIPP 2024 Scheme.
U Commissioner ka tnad Transport un dei u ‘Nodal Agency’ ban pyntreikam, katba ka State Level Committee kaban khlieh da u ophisar uba la rangbah tam ha ka kyrdan Secretary, Transport un mynjur ia ki jingai jingiarap, ban khmih bniah bad ban shimkhia ia ki jingeh.
