Shillong, Risaw 19: Daka jingsngewkhia halor ki kam runar bala leh da ki runar ha ka por lehniam Durga Puja ha ka jylla, ka Shillong All Faiths Forum (SAFF) ka la kyntu iaki nong shong shnong ban pynneh ia ka shongsuk shongsain.
U president ka SAFF Most Revd Dr Purely Lyngdoh u la ong ba ka Forum ka sngewsih bad sngewkhia halor ki jingjia ba dang shu jia.
Haba pynrem ia ki kam bymman, ka Forum ka la ong ba kum kine ki jingpyrshang ban pynthut iaka shongsuk shongsain ka pynjah burom iaka jinglong iatylli ki jaidbynriew hapoh ka Jylla Meghalaya.
“Kum kine ki kam bala leh da ki riew bymman ki dei ka jingpyrshang ba thmu ban pynthut ïa ka jingïatylli bad ka jinglong jingman jong ka jylla jong ngi,” ong ka SAFF bad bynrap, “Ka Meghalaya ka long barabor ka Jylla jong ka jingsuk ha kaba baroh ki jingngeit bad ki jaitbynriew ki ïa im lang bad ki rakhe ïa ki jinglehniam jong uwei pa uwei da ka jingburom bad jingïalong shi para.”
Ka Forum ka la kyrpad ia baroh ki nongshong shnong ban pynneh ia ka jingiatylli bad ban nym sngap ia ki khubor hamsaia.
Ka SAFF ka la ong ba ka la kyrpad ïa ka Sorkar Jylla bad ki bor District “ban shimkhia mardor bad pyrkhing pyrshah ïa ki nongleh kam sniew bad ban pynthikna ïa ka jingïada kaba biang na ka bynta ka jinglehniam ïa ka Durga Puja”.
“Ngi kyntu ruh ia ki paidbah ba kim dei ban ngeit ia ki khubor lamler bad ban ai ka jingiatreilang kaba pura bad ki bor Sorkar bad bor district ha kaba pynneh ia ka suk ka sain,” ka la bynrap.
