Shillong, Risaw 19: Ki Pulit ka Meghalaya kila pynjur ia ka jingpahara ha kylleng jong ka nongbah Shillong ha ka jingrakhe ia ka Durga Puja, da kaba buh shuh shuh ia ki pulit kiban iaid da ki kjat bad ki mobile patrol, ka jingbuh ia ki jaka ban peitngor bad ka jingpynjlan ia ka jingpeitngor ha ka por mynmiet haduh ka ka por 5:30 ne 6 baje mynstep.
U SP Traffic u Hari Prasanta ula ong, ba la nang pynkhlain ia ki lad ban ai jingiada bad ia kane lah pynthikna ha ka High-Level Review Meeting bad ka Central Puja Committee (CPC), kaba la lum da u Chief Secretary bad la wan ban iashimbynta lang da ka Director General of Police.
U Prasanta ula ong, ba la shim shuh shuh ia ki sienjam, katkum ki jingtip kiba la iohlum na ka CPC, da kaba phaikhmat baroh sha ka jingpeitngor ha ka por miet bad dang step phyrngab. La pynjur shuh shuh ia ki bor pulit ha ki jaka kiba lah ban mih kano kano ka jingma.
“Katkum ki jingtip na ka Central Puja Committee, ngi lah rai ban pynjur iaka jingpeitngor, kaba kynthup ia ka jingiaid da ki kjat ne da ka mobile patrolling. Ngi lah pynjur ruh ha kiba bun ki lad bad ngi lah pynjlan ruh ia ka por, khamtam eh ha ka por dang step phyrngab naduh ka por 12 baje shiteng synniang haduh ka por 5:30 ne 6 baje mynstep” ula ong.
Kane ka rai kala mih hadien ba kala don ka jingwiang ding ha ka por shiteng miet kaba la pynsngewkhia ia ka jingshngain ha ka por jong ka jingrakhe ia ka lehniam lehrukom. U Prasanta ula ong, ba ka jinglong jingman kala long kaba biang bad ki pulit kila shim shuh shuh ia ki lad ban iada na kino kino ki jingjia nangne shakhmat.
“Ka jinglong jingman ka long kaba biang. Kane kadei tang kawei na ki jingjia kaba la jia” ula ong.
“Ban pynthikna ia katei, da kaba don ha ka liang kaba la phikir lypa, ngi lah pynbun shuh shuh ia ka jingpahara, ngi lah pynjur ia ka jingpeitngor bad ym donkam ban khuslai eiei shuh halor kane” ula bynrap.
Halor ka jingtohkit ia ka jingwiang ding, u Prasanta ula pynthikna ba kam shim la don kano kano ka jingkem haduh mynta. Ula ong, ba ki pulit kila bteng ban pynlong ia ka jingtohkit bad kin shim ia ki sienjam hadien ba la lah ban ithuh ia kito kiba la donkti.
“Ka jingtohkit ka dang iaid shakhmat. Tang hadien ba lah pyndep ia ka jingtohkit kaba bniah, ngin sa lah ban tip ia ki briew kiba donkti bad ngin sa lah ban shim ia ki sienjam kiba mardor halor ka jong ki” ula ong.
