Shillong, Risaw 14: Palat 88,000 ngut ki samla pule ST ha Meghalaya kila ioh ia ka scholarship ba pura hapoh ka Umbrella Post-Matric Scholarship u snem 2025-26, da ka jingpynlait ka Jylla ia ka instalment ba khatduh hynne ka sngi Balang.
U Myntri Rangbah ka Jylla u Conrad K Sangma, ula pyllait ia ka Second bad Final Instalment ha ka jingialang kaba la long ha St Anthony’s College, Shillong.
Haba kren ha ka jingialang u Myntri Rangbah ula ong, kawei na ki jingsngewkhia jong ki samla pule kadei halor ka bai bam ne Scholarship, “Mynta ka sngi, nga dap da ka jingkmen ban pyllait ia ka Scholarship jong u snem pule 2025-26 bad ban lah ban pynurlong ia ka jingangnud ia ka jingdonkam bad ia ka jingthrang” ula ong.
Ula pyntip ba ia ka jingpyniaid shakhmat ia ka DBT kadei kaba kila sdang mynta.
U Myntri Rangbah ula pyntip ba kila don ki jingsahteng ban phah ia katei ka pisa sha ki nongioh jingmyntoi namar ba kim shim la pyniasoh ia u Aadhaar bad ka Bank Account ka jongki, ne kadei ba ka dang sahteng ka jingphah pisa da ka Public Financial Management System.
“Ka Tnad kaba dei khmih, kala shah bthah ba kan khmih bniah, pynbeit bad pyniaid shakhmat ia ki jingjia kiba dang sahteng tad haduh ba iwei pa iwei i khynnah pule ba dei hok in ioh pura ia katei ka pisa bad ula kyntu ia ki samla pule, ki bym pat ioh ia ka pisa ba kidei ban leit pynthikna lyngba ka jaka pule ka jongki ba ka Bank Account ka long kaba treikam bad kaba la pyniasoh bad u Aadhaar,” ula ong.
“Ia ngi, phi long kiba kongsan tam na ka bynta ka Sorkar bad phi don ha ka dohnud jong ka jingshim ia kano kano ka rai da ka sorkar” bad ka batai kumno ki polisi bad ki jingshim rai la shim da ka sorkar da kaba buh ha ka jingmut jingpyrkhat na ka bynta ka bha ka miat jong ki samla.
U Myntri Rangbah ula kyntu ia ki nongioh jingmyntoi lyngba ka Scholarship ban pyndonkam bha ia ka pisa ha kaba iadei abd ka pule puthi ka jongki.
Na ka bynta u snem pule 2025–26, 96,801 lah dep pynshisha ia ki nongioh jingmyntoi hapoh jong katei ka scheme, 88,061 ngut ki samla pule ne 91 per cent, ki lah dep ioh pdiang pura lut ia ka scholarship. Kine ki kynthup ia ki 52,839 ngut ki Fresh Applicants ne ki nongpynrung kyrteng thymmai bad 35,222 kidei ki samla pule kiba la shu pynthymmai ia ka kyrteng.
Ka Sorkar Pdeng bad ka Sorkar Jylla kala pyllait ia ka T.198.43 Klur na ka bynta ka scheme jongu 2025–26, ha ki ar tylli ki wat. Ka jingai kaba nyngkong ne First Instalment kaba long T. 93.95 Klur ka kynthup ia ka T.84.55 Klur na ka Sorkar Pdeng bad T.9.40 Klur na ka Jylla.
Ia ka bhah jong ka Jylla lah dep ban pyllait noh mardor khlem kano kano ka jingpynslem hadien ba la pyntip ban pyllait ia ka bhah jong ka Sorkar Pdeng. Ka jingai ha ka wat ka baar ne Second Instalment kaba T.104.48 Klur ka kynthup ia ka T.94.03 Klur na ka Sorkar Pdeng bad T.10.45 Klur na ka Sorkar Jylla.
Ki nongioh jingmyntoi baroh ha ka Second bad Final Instalment jongka Umbrella Post Matric Scholarship ka long 96801 ngut.
U Myntri Rangbah ula plie ruh ia ka PG Block Biotechnology Department & Bio-Informatics Lab, ia ki bynta kiba la tei thymmai jong ka College & ki tiar ki tar kiba la thied lyngba ka RUSA 2.0 bad ia ka Computer Lab hapoh jongka Chief Minister’s Skills Mission ha kaba la iadonlang u Myntri ka Pule Puthi u Bah Lahkhmen Rymbui, u Myntri ka Tnad Arts & Culture u Bah Sanbor Shullai, u Fr Arcadius Puwein, Principal ka St Anthony’s College, u Commissioner & Secretary ka tnad pule puthi u Vijay Mantri bad kiwei kiwei.
