Pat ioh jingthoh eiei, mih tang ha ki kot khubor
Shillong, Risaw 14 : Ka jingiatai nia kaba thnem bha kala mih hapoh ka Dorbar ka Khasi Hills Autonomous District Council (KHADC) ha ka sngi Balang hadien ba u Chairman Bah Strong Pillar Kharjana ula kyntait ban pdiang ia ka Zero Hour Notice bala wanrah da u MDC ka Laban Bah Ricky Shullai halor ka jingpynphai pat u Lat ka Jylla ia ka Amendment Land Bill.
Haba wanrah ia kane ka mat, u Bah Ricky ula buh jingkylli ia ka rai u Chairman ban nym ailad ban iakren halor kane ka kam kaba u ong ba dei kaba la iatip paidbah.
“Ngi kum ki dkhot ngi don ia ka hok ban wanrah ia ka zero hour notice ban iakren ia ki kam tang mar syn dep ka kynta kylli jingkylli. Kan ktah aiu ia phi, Chairman, ban shah ia kane? Balei ba phi kyntait ia kane ka zero hour notice” buh jingkylli u Bah Ricky.
U ong ba ka Iingdorbar ka don ia ka hok ban pan ia ka jubab na ka Executive Committee hadien ba kikot khubor kila sot ia u Symbud Myntri Rangbah ka Jylla ba khmih ia ka tnad District Council Affairs Bah Prestone Tynsong ba ong ba ia kane ka Bill la pynkhai pat sha ka Council.
“Lada phi shah ia ka jingiakren, ngin ia ioh ia ka jubab na ka Executive Committee. Ha ki kot khubor, u Symbud Myntri Rangbahka Tnad District Council Affairs Bah Prestone Tynsong, ula ai jingkren ( ba ia ka land bill la pynphai pat da u Lat). Kumta ka dei ka hok jong ngi ban ioh ka lad ban kren bad iatai halor kane ka mat. Nga sngewsih jur kum u dkhot ba phi khlem ailad ia kane bad phi kyntait ia ka” ong u Bah Ricky.
Haba pynksan ia ka rai, u Bah Strong ula pynskhem ba u Chairman u don iaka bor ban shim rai, khamtam haba ym pat don kano kano ka jingpyntop kaba wan lyngba ka jingthoh.
“Kumba long mynta, ka dei ka rai jong u Chairman ban shah ne ym shah khamtam ba kam pat dei da ka jingthoh. Ka dei ka bor jong u Chairman. Kaei kaba mih ha ki kot khubor ka dei ka bym lah ban shim kum ka jingtip kaba thikna. Kaei kaba ngin iakren haba kam pat don satia kano kano ka jingthoh kaba poi sha ka Council” ong u bah Strong.
Haba kyrshan ia ka nongrim u Chairman, u CEM ka KHADC ula ong ba kam don eiei ban iakren lada ym pat don ka jingpyntip kaba la wan da ka jingthoh.
