Shillong, Risaw 14: Ka jingpyntreikam ia ka Khasi Social Custom of Lineage Act kam pat long pura satia, ha kaba ka Khasi Hills Autonomous District Council (KHADC) kala kubur ba kam shym la lah ban thaw ia ka Tribunal ba la bthah da ka amendment 2023.
Ia kane la pyntip da ka EM ba khmih ia ka Tnad Law and Legal Matters kong Deity H Majaw ha ka kynta kylli jingkylli ha ka dorbar jong ka Council, haba ai jubab ia u nongïalam ka liang pyrshah bah Titosstarwell Chyne.
Ka kong Majaw, ha jubab da ka jingthoh, ka la pynskhem ba ka Executive Committee kala pyntreikam ia ka Khasi Hills Autonomous District (Khasi Social Custom of Lineage) Act, 1997 bad ki Rules 2007 kumba ka long, ban iada, ban pynneh pynsah bad ban kyntiew ia ka jingai pateng sha ka Kynthei.
Hynrei hadien ka la mynjur hapoh ka ïing dorbar ba kawei ka bynta kaba kongsan – ka Tribunal ban bishar ïa ki jingïakynad halor ka jingai jait – ka dang sah khlem trei kam.
Haba u Bah Chyne u la kylli hato la thaw ne em ia ka Tribunal bad mano ba dei ki dkhot jong ka, ka kong Majaw ka la jubab da kaba ong “Haduh mynta, ngim pat lah ban thaw ia ka Tribunal.”
U Bah Chyne u la khot ia ka jingpynslem kum ka kam kaba khrah bha , da kaba kdew ba ka Act jong u snem 2023 ka kren shai ia ka Tribunal ban bishar ia ki jingiakynad kiba iadei bad ka jingai jait aikur.
Ka kong Majaw ka la pynshong nongrim ia ka jingpynslem sha ka jinglut kaba heh bad ki kyndon ba eh kiba donkam ha ka jingthung ia ki dkhot.
“Ka jinglut kan long kaba heh bha.Ka Tribunal kan don bun ki dkhot bad ki riew shemphang. Ngi donkam la kumno kumno ia u nongiasaid ain uba la trei 10 snem. Ki don shibun ki jingeh. Ngi dang ia pyrkhat bad ngin sa iakren kumno ban pyntreikam ia ka,” ka la ong.
Halor ka jingkylli bynrap jong ka MDC ka Nongpoh kong Rona Khymdeit ha kaba ïadei bad ka Shaw Bhoi, ka kong Majaw kala pyntip ba ia mynta ym pat lah ban pynkylla ha kaba iadei bad ka Shaw Bhoi namar ba dang pan kyrteng ban thaw ia ka committee.
Ka kong Khymdeit ka la kdew ba la pynlong ia ka committee ha kaba sdang jong u snem 2025 ban pynkylla ia ki kyndon kiba iadei bad u Shaw Bhoi hapoh ka Lineage Act.
Ka kong Majaw ka la jubab ba katba ka jingpynkylla ha u snem 2023 ka la kynthup ia ka Shaw Bhoi, hynrei mynta ki rangbah na Ri-Bhoi ki la dawa shuh shuh ia ki jingpynkylla.
Shwa ia kane, ka kong Majaw ka la pyntip ba ki don 113 tylli ki Seng Kur kiba la wan shakhmat ban register naduh ba la treikam ka amendment ne ka jingpynkylla 2023.
