Shillong, Risaw 14 : Ban pynkut ia ka jingpynieng kali kulmar hapdeng eh jong ka sor, ka Sorkar Meghalaya kala rai ban pynkynriah ia baroh ki kali tourist ka Assam sha ki artylli ki jaka bala ithuh kyrpang-ka MUDA parking ha Keating Road bad ka SRGT.
U Symbud Myntri Rangbah ba khmih ia ka Transport Bah Sniawbhalang Dhar u iathuh ba ia kane ka rai la shim ha ka jingialang ba long ha ka sngi Balang bad ki Ophisar ka Tnad Transport.
“Ha kine ki khyndiat taiew bala lah, kane ka dei ka mat ba sahteng. Ngi la iakren hangno ban pynieng ia ki kali tourist ka Assam hangne ha sor. Mynta ngi la rai ban ai jaka ia ki ha ka thain Keating Road kaba don ka jaka pynieng kali ka MUDA” ong u Bah Sniawbha.
U iathuh ba ki jingujor kila nang kynton halor ka jingpynieng kali pathar hajan ka Secretariat, Nan Polok bad Pinewood Hotel.
“Ngi la ioh pdiang ia ka jingkyrpad na u Myntri ka Sorkar Assam Atul Bora, uba dei u Chairman ka Committee na Assam, bad ioh ruh ia ka jingthoh na ki nongpyniaid ki kali tourist ka Assam. Mynta ka sngi ngi la shim rai ia ka jingpynbeit” ula ong.
Kat kum ka plan, ki kali rit kin pynieng hapoh ka MUDA complex katba 10-20 tylli ki bos heh yn shah ban ieng ha SRGT.
“Kam itynnad satia haba ki shu pynieng kali ha shilynter ka surok. Kane kan pynbeit ryntih bad pynitynnad. Ki lah ban pynhiar ia ki passenger ha Secretariat ne Khyndailad bad sa leit pynieng ha kine ki jaka bala buh. Ki kali trai jylla kila dep don lypa iala ka jong ka jaka pynieng kali” ong u bah Sniawbha.
Halor ka jingpan jaka pynieng kali ki Khasi Hills tourist taxi ha Guwahati Airport, u Bah Sniawbha u iathuh ba ka Sorkar Jylla kala iakren ia kane ka kam bad ka Adani Group kaba pyniaid ia ka airport.
“Ka kam kan dang ban pyndep. Shisien bala dep shna ia ka jaka pynieng kali, kin sa buh kyrpang ia ka jaka na ka bynta jong ngi” ula ong.
U Bah Sniawbha u iathuh ba ka jaka pynieng kali ha ISBT ka plie lut ia baroh bad ong ba kam don satia kano kano ka jingpyrrkhing ia ki kali tourist ba kin leit sha ki jaka jngohkai.
“Ki lah ban leit kat shaba ki kwah- Sohra, Dawki. Mano ba lah ban khang ia ki” ula ong.
