Nongstoin, Risaw 14 : Hadien lai bnai duna ba ki paidbah ka West Khasi Hills kila duh khaw rashon, u Myntri ka Tnad Food & Civil Supply Bah Methodius Dkhar ha ka sngi Balang, ula lah ban iakren pynbeit bad poi sha ka jingiasngewthuh jingmut bad ka Shnong Pyndengrei ban lah pynpoi khaw biang sha ka kudam ka Food Corporation of India (FCI).
U Myntri ula iakynduh ia ki nongialam shnong ka Pyndengrei ha ka jingialang kaba la long hapoh ka Ophis ka Deputy Commissioner ka West Khasi Hills, ha ka jingiadon lang u MLA ka Nongstoin Bah Gabriel Wahlang bad kiwei kiwei.
Na ka liang ka Shnong Pyndengrei la ialam da u Sordar Bah Micheal Marwein lem bad ki dkhot. Ki Ophisar ka FCI ruh kila iadonlang ba kyntup ia u Deputy Manager Mritunjay Kumar, ki Ophisar ka Tnad Food & Civil Supply bad ka PWD.
Kane ka jingialang kala iatai sani ia ka jingeh kaba ki nongshongshnong ka West Khasi hills kila iakynduh ha kine ki laibnai namar ka jingbym ioh ia u khaw rashon bad kiwei ki marbam bad hadien katto katne kynta, baroh ki liang mamla kila poi sha ka jingiasngewthuh jingmut bad jingiamynjur lang ban pynpoi noh ia u khaw rashon sha ka kudan FCI kumba ju long.
Haba kren sha ki nongthoh khubor, u Sordar ka Shnong Pyndengrei, ula iathuh ba naduh u snem 2024, ka Shnong kala dep ai da ka jingthoh sha ki bor Sorkar kynthup shaduh u Myntri Rangbah ka Jylla, ba un peit lem ia ka surok kaba jngai tang kumba 160 meter na ka surok bah sha ka kudam ka FCI.
U ong ba kane ka surok ka dei kawei na ki surok kaba ju jia khah khah ka jingtwa khyndew khamtam ha ka por lyiur bad kane ka dei kawei ka daw kaba la pynsniew bha ia ka surok.
Hynrei u iathuh ba ka Shnong kat haduh mynta kam shym la ioh satia ia kano kano ka jubab kaba la pynbor ia ka Shnong ban shim ia ka sienjam ban khang ia ki trok ba kin wan pynpoi khaw sha kudam ka FCI.
U iathuh ba mynta ka sngi u Myntri ka Sorkar Bah Methodius Dkhar ula shim ia ka jingkitkhlieh ban leh eiei noh haba iadei bad katei ka surok.
U Bah Micheal ula ong ba watla ka jingiakren kala poi sha ka jingmynjur lang ban plie noh ia ka surok, hynrei lada ka jing iakren ka shu kut tang ha ka ktien khlem ka kam, ka shnong kan sa leh ia kaba donkam.
U Bah Methodius Dkhar u la ong, “Ha kine ki khyndiat por kiba la dep ki la don ki khubor kiba pynsaphriang bakla sha ki paidbah. Hynrei mynta ka sngi ngi pynshai sha ki paidbah ba kim dei ban shah ïalam bakla ha ki khubor ki bym da tip ïa ka jingshisha”.
“Hooid ym lah len ka la don ka jingeh khyndiat, ha kaba na ka liang ka shnong Pyndengrei ki pynpaw halor ki jingeh kiba ïadei bad ka surok kaba wan na surok bah shaduh sha FCI, namar ka surok ka sniew palat na ka daw ka jingïaid ki trok kit khaw kiba 12 taiar bad 16 taiar. Kata hi kaba ki nongshong shnong ki pynpaw ka jingeh. Ki kwah ruh ba ka tnad bad ka PWD kin ai ka jingpynskhem ba lada ka sniew katei ka surok ba ki dei ban pynbha”, ong u Bah Methodius.
“Nga ai khublei sha baroh ki nongïalam shnong Pyndengrei khamtam ïa u sordar shnong bad ïa baroh ki tnad kiba la shimkhia ïa kane kynthup ïa u MLA ka Nongstoiñ, ba naduh mynta ka sngi kan ym don shuh kano kano ka jingeh bad na ka liang ka tnad kan lah ban pynpoi biang ïa u khaw kumba ju long baroh shikatta”, ong u Myntri.
