Shillong, Risaw 14 : U Deputy Commissioner ka East Khasi Hills Abhilash Baranwal ha ka sngi Balang ula ong ba ki bor district kin pynthikna ba ki Durga Puja pandal ba shna ha surok PWD kim dei ban ktah ia ka leit ka wan u paidbah, haba kular ba ka jingpynkynriah ia ki katto katne ki pandal mynta ka long kaba eh.
Haba jubab ia ka jingpyrshah jong ki kynhun sengbhalang, u Baranwal u iathuh ba ula bthah ia ki sector magistrate ba kin iatreilang bad baroh ki kynhun ba don bynta.
“Don katto katne ki kynhun sengbhalang kiba la wan shakhmat ban pyrshah ia ka jingshna ia ki Puja pandal ha surok PWD, khamtam haba iohi ia ka jingktah ia ka leit ka wan u paidbah, ngi la shimkhia ia kane ka jingpyrshah bad bthah ia ki sector magistrate jong ngi ba kin pynbeit ia kane ka kam” ula iathuh.
“Man ki sector magistrate kila khmih ia ki sector bapher bapher, ngi la bthah ia ki ban iatreilang bad ki Dorbar Shnong, ki OC bad kumjuh ruh bad baroh ki kynhun ba don bynta ban lah pynthikna ba ym dei ban pynthut ia ka leit ka wan u paidbah, haba burom ruh ia ka hok lehniam jong ki paid Hindu” ula bynrap.
Halor ki jingujor pyrshah ia ki pandal ha surok PWD, khamtam ha RR Colony, ula ong “U sector magistrate ula iashong jingialang la 2-3 sien bad ka Dorbar Shnong”. U pynpaw ba ka jingpynkynriah ia ka pandal mynta kan wanrah jingeh ia ki committee.
U iathuh ba ia ka RR Colony Committee la shah ba kin pynbteng mynta u snem kat kum ka NoC ka PWD hynrei ryngkat ka jingmaham kaba shai.
Halor ka jingpyniaid kali, ula ong “Ngi la iakren bad ka Ophis u SP ba ka jingpyniaid ia ki kali ka dei ban long ha kata ka rukom ba dei ban pynduna ia ka jingkhapngiah bad ka jingpyniaid na kiwei pat ki lynti”.
Halor ka jingleit pynngam blei, u Baranwal ula iathuh la pyniapher ia ka por ban pynlong ia kane namar ka jingiaid ka kam pynroi ia ki rud wah.
