Shillong, Nailur 22: Da ki spah ngut ki nongshetja mid-day meal jong ka PM Poshan ha Meghalaya kila sangeh treikam naduh ka 1 tarik u Nailur ban dawa ban kyntiew noh ia ka Honorarium kaba ym shim la kyntiew mynta lah palat 20 snem.
Ki nongshetja kila pynlong ia ka jingiashong kyllain mungor ha Khyndailad ha ka sngi baar haba ka jingiakhih kala jam sha ka sngi kaba 22 khlem kano kano ka jingioh jubab na Delhi.
Ka President ka Union u Gina Nengnong ula ong ba la pynbor ban pynlong ia ka jingiakhih hapdeng ka jingiai bteng ban kyrpad naduh u snem 2019 ia kaba kam shim la don kano kano ka jingshimkhia.
“Ngi lah iai phah ia ki shithi sha u Myntri Rangnahduh ka ri u Narendra Modi naduh u snem 2019 lyngba ka All Jaintia Midday Meal Workers. Ha u snem 2023 ngi lah thaw ia ka Union of Cook cum Helper PM Poshan Meghalaya bad phah sha u Myntri Rangbahduh ka ri, Myntri ka Pule Puthi bad Myntri Pla Tyngka hynrei haduh mynta ngim shim la ioh ia kano kano ka jubab” kala ong.
Kumba long mynta, ki nongshetja ki ioh T.2,000 shi bnai ha kaba T. 900 kadei kaba ai da ka sorkar pdeng hapoh jongka bhah kaba 90:10, katba ka T.1,100 kadei na ka jylla. Ka jylla kala pynkiew ia ka bhah jongka na ka T.100 sha ka T.1,100 ha u 2022 hapoh ka jingialam u Myntri Rangbah u Conrad K Sangma.
“Ka T.900 jongka sorkar pdeng kala neh beit kumjuh mynta la 20 snem. Da ka jingkiew ki marbam mardih, ngim lah shuh ban pyndap pynbiang” ong ka Kong Nengnong bad ka dawa ba dei ban kyntiew noh ia ka bhah jong ka sorkar pdeng sha ka T. 9,000.
Kala ong, ba ka jingiakhih kan iai bteng haduh ka 30 tarik u Nailur. “Lada pynsangeh ia kane ka scheme, ki khynnah bad ki longiing kiba duk kin mad jingeh. Ka scheme kala iarap ia kiba bun ki khynnah. Ngi kyntu ia u Myntri Rangbahduh ka ri ban shimkhia lem mardor” kala bynrap.
