Shillong, Nailur 22 : Hynniew bnai hadien ka jingpdiang ia ka jingujor pynkhein ia ka hok longbriew, ka Meghalaya Human Rights Commission (MHRC) ha ka sngi Ba-ar kala khot ia ki nongshongshnong ka Daistong ban wan ai sakhi mar met halor ka jingkynnoh shah pakhang lynti ban leit sha ka public hearing ka Shree Cement ha u bnai Nohprah bala lah.
Ia ka jingujor la mudui ha ka 9 tarik Rymphang halor ka public hearing ba long ha ka 19 tarik Nohprah, 2025 ha Daistong.
Haba kren na ka bynta kinongshongshnong hadien ba wan mih hakhmat ka Commission, u nongtrei mon sngewbha Bah Reachingson Siangshai ula ong ba ka MHRC kala shong bishar ia kane ka kam haduh 7-8 sien naduh ka 10 tarik Rymphang.
“Mynta ka dei ka sien ba nyngkong ba kila phah ia ngi ban wan dalade. Mynta ngin ap ia kaei ka jingmih” ong u Bah Siangshai.
Ki nongshong shnong kila kynnoh ba kila shah khang lynti ban leit sha ka public hearing ha ki ar jaka-kawei hashuwa ban poi ha Daistong ha kaba ki trai shnong dalade kila shah khang bad kawei pat ka dei ki sengbhalang bad ki riew paidbah kila shah khang ban leit sha kane ka jaka ba don ka hearing.
“Kiba bun na kito kiba khang lynti ia ki briew ki dei ki riewtap durkhmat, kumba phi la iohi ha ki lad pathai khubor” kynnoh u bah Siangshai haba pyntip ba ka Commission kala pyntip sha ki ba kan sa pynmih ia ka hukum.
“Ka Commission kala pyntip ba kan sa pynmih ia ka hukum bad ngi dang ap ia kane. Ngim lah ban tip la kan mih hadien shisngi, shitaiew ne shibnai. Ki paidbah ka Daisting kila pynpaw ia baroh kiei kiei ha ka jingujor. Mynta ka shong ha ka kashari ka MHRC ban ai ka rai” ula ong.
