Shillong, Nailur 22 : U Superintendent of Police (Traffic) ka East Khasi Hills, Hari Prasath MR ha ka sngi Ba-ar, ula ong ba ki Heh Pulit kila ioh pdiang ia ka legal notice ba ai da ka Khasi Students’ Union (KSU) bad kan sa ai jubab lyngba ki lynti jong ka ain.
Ka KSU ha ka sngi Nyngkong kala ai legal notice ia u SP (City), Shillong Bah Dangsan Khyriem bad SP Traffic Hari Prasath MR.
“Hooid, ngi la ioh pdiang ia ka legal notice. Ia mynta kam pat long ia ngi ban kynthoh eiei ia kaei kaba don ha kane ka notice. Namar ba ka dei ka legal notice, ngin sa jubab lyngba ki lynti jong ka ain kiba dei” ong u Prasath ha ka sngi Ba-ar.
Ka KSU kala dawa, hapoh 15 sngi, ia kine ki heh Pulit ba kin pan map hakhmat u paidbah lyngba ki lad pathai khubor bad ban nym pynmih shuh ia ki jingkynnoh ba bakla bad ba pynjah burom pyrshah ia ka KSU, ia ki dkhot bad ki nongialam.
“Kum ka tnad ba pyntreikam ia ka ain, ki don katto katne ki rukom treikam ha man ki kam bad ia kane hap ban iaid lyngba ki lynti ka ain. Kam iahap ia nga ban kynthoh eiei” ula ong.
