Tura, Nailur 22 : U Myntri Rangbah ka Jylla ConradK Sangma ha ka sngi Ba-ar, ula aiti ia palat 62 tylli ki sanction order ba shongdor T.3.14 klur hapoh ka Chief Minister’s Special Development Fund (CMSDF) bad ka Chief Minister’s Special Grant (CMSG) ha Tura ban pyntrei ia ki kam pynroi ha ki 40 tylli ki constituency ka Jylla.
Na kine ki 62 tylli ki sanction order, 54 tylli ki kam ka CMSDF bad 10 tylli ki CMSG grant. 32 ngut ki nongioh bynta ki dei ki nongshongshnong kiba iakynduh markhmat dalade ia u Myntri Rangbah ha ka CM Darbar ba long ha u bnai Iaiong, Jymmang, Jylliew bad Naitung ha Tura bad ha kiwei ki jaka ka ri-lum Garo.
Ia ki dorkhas jong ki la pynkylla sha ki sanction order hapoh ka 105 sngi, ha kaba 11 tylli ki dorkhas na ka darbar ba long ha u Naitung la pynlait noh tang hapoh ka hynniew taiew. Ki 24 tylli kiba sah ki dei kiba buddien na ki record ba don ha Ophis bad ki constituency register bad phra tylli ki jingtyrwa thymmai kiba wan lyngba ki MLA bad ki tnad treikam.
Kine ki sanction order kin kyrshan ia ka jingthaw ia ki nongkynti paidbah ha kylleng ka ri-lum Garo. Kine ki kynthup ia T.19.3 lak na ka bynta ki iing skul, maramot bad painkhana, T.81.5 lak naka bynta ki 16 tylli ki surok bad ki surok dewbilat, T.47 lak na ka bynta ki 6 tylli ki Community Hall bad ki Nokma Kachari Building, T.38.5 lak na ka bynta ki phra tylli ki kynroh bad check dam, T.33.2 lak iaki khyndai tylli ki culvert, footbridge, ki sem bad kiwei kiwei bad T.23.3 lak na ka bynta ki hynniew tylli ki kam ba iadei bad ki jingialehkai, kisamla bad ki prokram ba kyrshan ka CMSG.
Ka jingkyrshan na ka CMSG iaki samla ka kynthup ia ka jingiarap pisa ban pynlong ia ka Open Inter-School Chess Competition ha Ampati, ka Inter Mahari Football Tournament, ka Youth Excursion sha Sikkim, ka Exposure trip ki khynnah pule ka Don Bosco Secondary School Chandigre bad Dalu Govt Higher Secondary School sha Darjeeling, ka jingleit iashim bynta ki samla ha ka World Youth Day 2027 ha Suth Korea bad ka jingthied ia ki tiar put tiar tem na ka bynta ki kynhun tem ka thain.
Ia kine ki kam yn pyntrei da ki Self Help Group, School Managing Committee, ki Sports Associaton, Village Development Committee bad ki Dorbar Shnong.
Napdeng jong ki ka dei ka jingiarap ban shna ia ka footbridge ha Chasingre, ka surok dewbilat ha Rongkhon Songgital, ka Check Dam bad ka kynroh ha Amongpara, box culvert ha Kongbangpara, School Building ka Jesus Blessing English Schiil ha Sonagre, ka basketball court ha St. Andrew Secondary School, Building ka Babelapara Higher Secondary School, ka School Van ka St. Alphonsa’s School, ka Community Hall ha Rimrangpara, surok CC ba lah ban iaidki jeep ha Chengkurigre bad Gongglanggre, culverts ha wadduid Nepal Chiga, ka kynroh ha Gambal Ading, jingpynbha ia ka madan ialehkai ha Rongkemgre, maramot ia ka Adhoc LP School ha Asibra bad ka kynroh ha Tewaligre Catholic Church.
