Agartala, Naiwieng 8: Ka longkmie kaba la shah kynnoh ha khmat eh ha ka jingthombor ïa ki shipai Border Security Force (BSF) ha ka 2 tarik u Naiwieng , ha Ashabari Bazar, Sepahijala District ka la shah kem, ryngkat bad u khun Rabiul Hossain bad uwei pat u briew ba kyrteng u Mahabul Hossain.
U Superintendent of Polive ka Sepahijala District, u Bijoy Debbarma u la pynthikna ïa ki jingkem ba dang thymmai eh ha ka sngi saitjaiñ.Da kaba u la ong ba ia kane ka kam la register case ha Kalamchoura Police Station bad ka jingtohkit kala iaid sha khmat.
“Mynta ka sngi ngi la kem sa lai ngut ki riew shimet kiba shah kynnoh, kiba kynthup ia kawei ka kynthei.Ngi la dep ban rah ia katei ka kynthei kaba shah kynnoh hakhmat ka kashari, bad ka kashari ka la phah ia ka sha police custody remand haduh ka 13 tarik u Naiwieng ban tohkit bniah”, la ong u Debbarma.
U SP u la iathuh ba uwei na ki briew kiba la shah kem la kynnoh ba u la knieh ia ka tiar siat na uwei u shipai BSF ha ka video jong katei ka jingjia.Uwei pat u la shah kynnoh ba u la thombor ia u shipai.
Ki pulit kin rah ia baroh arngut ki briew hakhmat ka iingbishar ha ka sngi U Blei bad kin pan ban buh hapoh Police Custody jong ki ban tohkit bniah.
U Debbarma u la ong ba ka jingpyrshang ka dang iaid shakhmat ban wad ia ki nongshah kynnoh kiba dang sah kiba dang phet rieh.“Ym don mano mano ruh ban lait im”, u la ong.
Ha kajuh ka por, ka kashari ka la pynjlan ia ka por set phatok jong ki pulit ia ki hynriew ngut kiwei pat ki nongshah kynnoh da hynniew sngi, haduh ka 13 tarik u Naiwieng.Ki pulit ki dang bteng ia ka jingtohkit halor katei ka jingshah thombor bad ka jingshah knieh ia ka suloi.
U SP u la ong ba ka jinglong jingman ha katei ka thain la lah ban the lakam.Ki Pulit, BSF bad ki CRPF ki dang pynlong ka jingkhynra ne ka joint operation bad ka Flag march ban teh lakam ka long kaba thikna bad kaba la lah ban tehlakam ia ka suk ka sain.
Ha kawei pat ka khubor kaba ïadei bad kane, ki kynhun ba ïatreilang jong ki BSF, ki pulit bad ki ophisar ka Revenue ki la pynlong ïa ka verification drive ïa ki jaka ha ki jaka ba marjan bad khappud India bad Bangladesh.Ki heh sorkar ki dang jurip ia ki iing bad ki dukan, ki dang pynshisha ia ki kot ki sla trai bad ki dang buh pud ia ki jaka.Ki jinglap ba nyngkong ki pyni ba don ki jingtei kiba lah ban long kiba la tei ha ka jaka sorkar ne khlem ki kot ki sla kiba biang.
Kham mynshwa ha kane ka sngi Saitjaiñ, ki shipai BSF ki la leit ban khynra haduh 5 tylli ki dukan kiba don hajan ka ktem jong ki shipai BSF ha Rahimpur Bazar ha Ashabari bad la ïathuh ba ki la lap ïa shibun bah ki mar ba la suba ba ki dei ki mar khaii tuh.
Ki samla pule ki la mih ruh da ka jingiakhih pyrshah ha ka thain Boxanagar, da kaba pynrem jur ia katei ka jingshah thombor jong ki shipai BSF bad dawa ban leh eiei pyrshah ia kiba donkti.
