Shillong, Naiwieng 08 : Ka Shillong Lajong FC bad ka Sohryngkham SC ki la ioh ban khur ia ka nam jop ha ka lympung SSA Champions Cup 2026,kaba dei artad ka jingiakhun ba nyngkong ka Group B bad kane ka la wan hadien ka jinglah ban pynliem noh ia ka Sanmer bad ia ka Mawkhar SC ha ki jingiakhun kiba long haka sngi Saitjain, ha SSA Stadium, Polo.
Ka Shillong Lajong FC, ka la pynliem ia ka Sanmer SC tnoit da 1-0, kaba jia ryngkhat ba ia kane ka shi kol, ka la ioh ruh ba kan thep ha ka minit ba la pynjlan ia por. Kane ka kol ka dei kaba thep da u Wilbert Marbaniang (90+4).
Katba ka Sohryngkham ka la pynliem ia ka Mawkhar SC da 2-0.
Na ka liang ka kynhun ialehkai ka Sanmer ka la rung sha kane ka jingiakhun ha kaba ka la shah tynjuh borbah ha ka Shillong Lajong, pynban ki rang ialehkai ki jong ka, ki la ieng iakhun tyngeh bad ialeh katba lah ban ieng iada ia la ka kut ialehkai ka jong ka, kaba la buh jingeh ia ka Lajong ba kan ioh ia ki kabu ki jong ka ban thep ia ki kol.
Pynban ha ka khyllipmat ba ka jingiakhun ka khreh ban jam noh ha kaba kut, u Denzil Kharshandi u la trei shitom ban tehlakam ia ka bol bad ha ka por kaba biang bha ba u pashat sha u Wilbert uba la ioh ban tehlakam ia kane ka bol bad ban ioh ban pynpar ia ka bol sha lyndet jong ka kol.
Hapdeng ka jinghah tynjuh, ka Sanmer ruh ka la pyrshang lem ka buit ka bor ialehkai ka jong ka bad ba ka la ioh ruh ia la ka kabu ksiar, hynrei ha kaba kut ka long ba khlem da lah ban pynurlong ia ka sha ka kol.
Ka khubor na ka jingiakhun kaba ar pat jong ka sngi ka long ba ki kol ba la thep lyngba u Damanglangki Makdoh (18′) bsad Macheaveen Nongbri (57′) ka la biang pura ia ka kynhun ialehkai ka Sohryngkham ba kin pynliem noh ia ka Mawkhar SC.
Ka jingjop ka kynhun ka Sohryngkham ha kane ka jingiakhun hi ka long ba naduh kaba sdang, ka la sei ia ka buit ialehkai kaba shyrkhei bha ka jong ka ha madan, kaba man la ka por haba ka ioh ban rah shakhmat I kumba kan thep ia ki kol.
Haba phai sha ka kynhun ialehkai ka Mawkhar ruh ka la pyrshang ban ia ryngkat ka buit ka bor ialehkai ka jong ka, ha kaba u Donbok Sohtun u la ioh ba un head kumba kato katne sien ia ki bol, ki bym shim la poi pat sha ka thong ban lah ban pynkhih ia ka jar, kaba hangne ka donkam bha ia kane ka kynhun ba kan nym pynlehnohei than ia kum kine ki kabu kiba wan sha ka na ki jingiakhun kiba dang sah ha kane ka lympung.
Lashai pat ka sngi, ki jingiakhun kin dei naka bynta ka Group A ha kaba ka Mawpdang ka lahduh ka 4th Division kan mih madan ban iakhun pyrshah ia ka lahduh ka 2nd Division ka Mawpat ha ka por 2:0 mynsngi bad kane kan dei ka jingiakhun ba nyngkong ia ka Mawpdang katba ka Mawpat kan dei kaba ar kaba wan hadien ba ka la lah ba kan pynliem ia ka Nongkrem ha ka jingiakhun ba nyngkong ka jong ka.
