Shillong, Nailur 18 : Ka All Meghalaya Primary Teachers Association (AMPSTA) kala pyrshah jur ia ka hukum jong ka Tnad Pule Puthi, kaba wanrah ia ka jingthungkam thymmai ha ki skul LP ka Sorkar bad deficit hapoh ka Structured Pay Framework (SPF).
“Ngi mihkhmat ia ki hajar ngut ki nonghikai primary ba hikai ha ki skul Sorkar ha kylleng ka Jylla, Ngi la khot ia kane ka jingiakynduh bad ki lad pathai khubor ban pynpaw ia ka jingsngewkhia bad ka jingpyrshah ia ka hukum jong ka Tnad Pule Puthi” ong u Dipak D Sangma, President ka AMPSTA Garo unit.
Hapoh kane ka hukum, baroh ki jingthungkam thymmai ha ki skul LP ka Sorkar bad deficit na ki kam ba la mang naduh u 2027-28 kan hap noh hapoh ka SPF.
U Sangma ula ong ba kane ka SPF kam dei satia kaba mut na ka bynta ki kam regular. ‘Ka SPF kam dei ia ka sanction post, baroh ha Meghalaya ki tip ba ia ka SPF la pynmih na ka bynta ka fix pay kum ia ki skul SSA, RMSA bad Fourth Teacher, Science Grant bad Pre-Primary. Kam dei satia kaba mut ia ki santion post”.
“ki skul deficit kim dei ki skul shimet, ki dei ki ioh ba ioh jingiarap ha kaba ki kam nonghikai ki dei kiba la mang bad mynjur da ka Sorkar, kumta ban pyntreikam ia ka SPF ia ki kam bala mang da ka Sorkar bad skul defcit kam shonghok satia” ula ban jur.
Haba pynshai ia ka nongrim jong ka Association, u General Secretary Bah FC Shullai ula ong ba ka AMPSTA kam dawa satia ban weng kami a uno uno u Ophisar hynrei ban pynbeit ia ka hukum.
“Ngim don eiei ban ong halor ka jingdawa ban weng ia u lane pynkynriah ia u sha kiwei ki tnad hynrei lada ka hukum ka dang iai neh kajuh bad lada wan kino kino ki Ophisar ruh kan long hi kajuh, un hap ban pyntreikam ia kane, ta ka daw ngi kwah ban pyndam ia ka ym ban pyndam pura namar ha kane ka hukum ki don ruh katto katne ki jingmyntoi na ka bynta ki nonghikai kiba dei ki SSA, Adhoc, Fourth Teacher bad kiwei” ula ong.
“Kaei kaba ngi kwah ka long ban weng noh ia ka kyntien Sorkar bad deficit, kane hi ka dei ka mat” ong u Bah Shullai.
