Shillong, Nailur 18 : Kum ka sienjam ban weng ia ka jingartatien hapdeng ki nonghikai bad ki nongwadkam, ka Tnad Education ka Jylla kala weng noh ia ka jingpynbna (notification) ba 12 tarik Nailar kaba ailad ban pyndap ia ki kam ba lait jong ka State Pay Scale lyngba ka Structured Pay Framework (SPF).
Ka jingpynbna bala pynmih da u Commissioner & Secretary Vijay Kumar Mantri ha ka sngi Palei ka ong “U Lat ka Jylla u sngewbha ban hukum ba ia ka jingpynbna ba 12 tarik Nailar 2026, lah weng noh mardor”.
Ia kane ka jingpynbna u bnai Nailar la pynmih haba pyntreikam ia ka jingmynjur bala phah ktien da ka Tnad Finance bad ka jingkular ban ai ia ka jingsiew kaba tam, kaba mih na ka jingpyntreikam ia ka SPF, kaba shah ban pyndap ia ki kam ba lait hapoh ka State Pay Scale lyngba ka SPF haduh u snem mang tyngka 2027-28.
Hynrei, ka Sorkar kala pynpaw ba kane ka hukum “kala pynmih ia ka jingsngew artatien bad sngewthuh bakla hapdeng ki nonghikai Sorkar, ki nonghikai deficit bad ki kyrtong wadkam haba iadei bad ka jinglong jingman jong ki kam nonghikai bala mang da ka Sorkar bad ki nonghikai deficit bad ka lawei jong ka deficit system ba don mynta lem bad ka Pay Scale ka Sorkar”.
Haba pynmih ia ka jingpynshai, ka Tnad kala ong ba kane ka jingpynbna kam mut ba “ia ka deficit system ba don mynta yn bujlinoh da ka Structured Pay Framework” lane ba “ia ki kam nonghikai deficit bala mang lane ki kam nonghikai Sorkar la pynduh noh, lane bujli da ka kam SPF”.
Kala pynshai ruh ba “ka jinglong jingman jong ka jingshakri ba iaid mynta, ka jingpynbeit ia ka jingsiew lane ka jinglong jingman ki nonghikai bala thung hapoh ka deficit system lane ka government pay scale la pynkylla noh da kane ka jingpynbna”.
Haba batai ia ka jingthmu, ka Sorkar ka ong ba ka jingpynbeit ba shipir ka long ban “ailad ia ka Tnad, ha kane ka por ba shipor, ban pynbiang ia ki jingdonkam nonghikai ba mardor da kaba thung/phah ia ki nonghikai kiba biang kyrdan hapoh ka Structured Pay Framework lyngba ka State Education Mission Authority of Meghalaya (SEMAM) na ki jingdonkam nonghikai ba don lypa ha ki skul Sorkar”.
Ka Tnad kala ban jur ba ka Sorkar ka “kut jingmut ban pynneh ia ka jingdon ki nonghikai bala mang”.
Ka jingpynbna ka ong ruh “Ka jingweng ia kane ka jingpynbna kam dei ban mut kum ka jingpynduh, jingpyndem, jingpynkylla lane bujli ia kano kano ka kam nonghikai sorkar bala mang lane ki kam nonghikai deficit bala mang”.
Ia kane ka hukum la pynmih ban wanrah ia ka jingshai bad pynthikna ia ka jingsngewthuh kaba shai da baroh ia kaei kaba long haba iadei bad ka deficit system, government pay scale bad structured pay framework.
