Shillong, Naiwieng 06 : U Deputy Commissioner ka East Khasi Hills Abhilash Baranwal ha ka sngi Thohdieng ula kyrpad ia ki kynthei kiba la rangbah ka rta ba iakhun pyrshah ia ka Shillong Ropeway project ha Barik ba kin leit phai noh shuwa sha iing bad sa wan iakhih biang lashai ka step.
Ki kynthei, hapoh ka lama jong ka Joint Action Committee (JAC) pyrshah ia ka Shillong Ropeway Project, kila pynlong ia ka jingiakhih da kaba shong kyllain mungor wat haduh ka por 7 baje janmiet, lai kynta hadien bala kut ka por ba ai jingbit.
U Baranwal u iathuh ba ula leit dalade sha katei ka jaka ba iakhih bad buh ia kane ka jingkyrpad markhmat jong ki.
“Kala dap 7 baje janmiet, ki dei ki longkmie bala rangbah ka rta. Na ka bynta ka bit ka biang jong ki, kidei ban leit noh sha iing. Kumta nga wan ban kyrpad ia ki kum u Deputy Commissioner. Ngi dang iakren bad ki, dang pyrshang ban pynsngewthuh ia ka jingsngew jong ngi” ula ong
Ula kular ba ki nongiakhih ki lah ban pynbteng biang ia ka jingiashong kyllain mungor ha ka sngi kaba bud.
“Na ka bynta ka bit ka biang jong ki hi, ngi kwah ia ki ba kin leit noh sha iing bad ka jingiakhih ka lah ban long biang ha ka sngi kaba bud. Kam don jingeh satia” ula ong.
“Ia mynta kila pynpaw ba ki kwah ban shong kham slem hangne hynrei u magistrate bad ki pulit kila don hangne bad kin iai bteng ban pynsngewthuh ia ki” ula bynrap.
Haba kylli halor ka jingpynkhein ia ki kyndon ai jingbit, u Baranwal ula ong ba ki bor districr kin sa shong bishar ia kane ka kam hynrei kim kwah ban leh eiei pyrshah ia ki.
“Ia ka jingbit la ai haduh ka por 4 baje janmiet. Lada don kiba pynkhein ia ki kyndon bala buh ha ka jingbit, ngin hap ban shong bishar ia kaei kaba lah ban leh hynrei kine ki dei ki longkmie kiba la rangbah ka rta, ngi kwah ban shu kyrpad ia ki……kumta ngi dang iakren bad ki” ula ong.
