Shillong, Naiwieng 6: Ka Sorkar Meghalaya kala kyntu ia ka Sorkar Pdeng ban shimti noh ia ki jaka kiba hap shabar jong ka jingker sainar ha khappud bad ban siew ia ka bai lutksan sha ki trai jaka bad haduh mynta ka sorkar ka dang ap ia ka jubab na ka Sorkar Pdeng.
U Symbud Myntri Rangbah ka Jylla uba khmih ia ka kam Pohiing u Bah Prestone Tynsong ula ong, ia katei hynne ka sngi Thohdieng, haba kylli shaphang ka jingpynieng ia ki mawpud ne Pillar ha khappud hadien ba kala don ka jingialang kaba dang shen bad ki BSF.
“Ki trai jaka, ki kwah na ka Sorkar Pdeng ba ha kum kitei ki jingjia, kiba jia ha katei ka rukom, dei ban ailad noh ia ka Sorkar Pdeng ba kan shimti bad ba kin siew ruh ia ka bai jaka” ong u Bah Tynsong.
“Kane ka mat kadei kaba lah bep ban pyntip sha ka Sorkar Pdeng, kumta ngi dang ap ban ioh ia ka jingpynshai na ka Sorkar Pdeng khamtam eh na ka Ministry of Home Affairs” ula bynrap.
U Bah Tynsong ula pynshai ba ki trai jaka kim pyrshah satia ban ker sainar ha khappud.
“Peit ka jingker sainar ha khappud ka long kaba suk, Nga hap ban ong, naduh na Garo Hills shaduh sha East Jaintia Hills, ki trai jaka, ki bor pyniaid shnong kim pyrshah eiei bad ngan kren shai bha ia kane” ula ong.
Ula ong, kaba ki sngewkhia bha kadei tang halor ki jaka kiba la shah ieh noh shabar jong ka jingker sainar.
“Ka mat kaba ki trai jaka ki sngewkhia bha kadei halor ka jaka. Shisien ba la pyndep ia ka jingker sainar, ki jaka kiba don shabar jong ka jingker sainar, namar ba kitei ki jaka kin sa kylla noh kum ki jaka ki bym dei shuh ki jongno jongno ruh ne ka “No Man’s Land, kan kylla long noh kum ka ‘No Man’s Land’, kin ym lah shuh ban leit ban rep ban riang” ula ong.
“Kumta kitei ki jaka kin sa kylla long noh kiba la shu lehnoh ei” ula bynrap.
Haba kylli ki don haduh katno kum kitei ki jaka, u Bah Tynsong ula ong, “Nga tharai kin don ym duna hapoh jong ka 45 km.”
