Shillong, Nailur 15 : Ki Cook-cum-Helper kiba trei hapoh ka PM POSHAN Scheme ha Meghalaya kin pynbteng ia ka jing sangeh treikam ba khlem buh por haduh ka 30 tarik Nailur haba dawa jingshai halor ka lawei jong ka skhim bad ka jingpynkiew ia ka honorarium.
Ki cook kila boycott ia ka jingleit shet jingbam ha ki skul naduh ba sdang jong u bnai Nailur.
U nongaibuit ka Union Bah Khroo L Pariat ha ka sngi Ba-ar ula ong ba kane ka jingiakhih kala iaid jait jai bad kala ioh ia ka jingkyrshan na ki nonghikai bad ki kmie kpa.
Ula pynbna ba kum shibynta ban pynjur ia ka jingiakhih,ka Union kan pynlong ia ka jingiashong kyllain mungor ha baroh ki district hedquarter ha ka 22 tarik Nailur.
“Ha ka22 tarik Nailur, ngin pynlong ia ka jingiashong kyllain mungor ba jai jai ha baroh ki district headquarter khnang ba kane ka jingsangeh treikam kan kham treikam bha” ong u Bah Khroo.
Ula ong ba ka Union ka kwah ia ka Sorkar pdeng ban pynshai la kan dang bteng ne em ia ka PM POSHAN Scheme.
“Ngi dawa ia u Myntri Rangbah Duh Narendra Modi bad ka kynhun myntri jong u ban pynmih ia ka jingpynbna la ka Sorkar India kan pynbteng ne pynsangeh noh ia ka PM POSHAN. Lada ka dang pynbteng, ka dei ban kyntiew ia ka honorarium” ula ong.
U Bah Khroo ula ong ba kane ka skhim ka long kaba donkam bha na ka bynta ka thain Shatei Lam Mihngi.
“Ngi shem ba kane ka skhim ka long kaba iarap bha, khamtam ha ka thain Shatei Lam Mihngi. Ngi ngeit ba hapoh ka jing ialam u Myntri Rangbah Duh Narendra Modi, un sa pyrkhat halor ka thain Shatei Lam Mihngi naba bun na ngi ngi dei ki riewlum bad ngi donkam ia kane ka skhim” ula ong.
U iathuh ba ki Kynthei ki dei kiba bun eh napdeng ki cook-cum-helper bad ka synniang jong ki sha ka jingkiew jong ka thain dei ban ai jingithuh.
