Shillong, Nailur 15: Ki nongrep ha Meghalaya ki la dawa ban pynkylla ia ka Draft Agriculture Policy sha ki ktien la jong kata ha ka ktien Khasi bad Garo.
Ka Hill Farmers Union (Central Body) ka la thoh sha u Agriculture Director bah S. Rani ba kyrpad ia ka tnad ban pynmih ia kane ka draft policy ha ka ktien Khasi bad Garo, nalor ka ktien phareng.
Ka union ka la ong ba ka jingpynmih ia ka draft ha ka ktien Khasi bad Garo kan pynlah ia ki nongrep ha ki jaka ba jngai ban pule bad sngewthuh ia ka policy bad ban ai ia ki jingai jingmut kiba kordor.
“Ngi sngewkmen ban ïohi ba ïa ka Draft Agriculture Policy la pynmih paidbah. Hynrei ngi kwah ban ai jingmut ba dei ban pynmih ruh ha ka ktien Khasi bad Garo khnang ba ki nongrep kiba sah ha ki jaka bapher bapher kin lah ban pule, sngewthuh, bad lada donkam, kin ai ruh ïa ki jingai jingmut ba kordor jong ki,” ong ka Union ha ka shithi.
Ka Union ka la niew ia ka kum ka jingkyrpad kaba rit bad ka la pynpaw ia ka jingshaniah ba ka tnad kan pyrkhat ia ka na ka bynta ka jingmyntoi jong ki nongrep.
