Shillong, Nailur 15: Palat 82 Percent ia ka Hearing hapoh jong ka Special Intensive Revision (SIR) 2026 lah pyndep hapoh Meghalaya, ha kaba la shem ba ki don 542 ngut ki nongthep vote ki ban ym lah ban ioh ia ka hok ban thep vote haduh mynta.
U Chief Electoral Officer u Dr B D R Tiwari ula ong ia katei ha ka sngi Baar hadien ba ula lum ia ka jingialang da kaba leh ia ka Video Conferencing bad ki
Deputy Commissioner, District Election Officer, ERO bad AERO nalor ki nongmihkhmat jong ki seng sain pyrthei.
Na ki 21.69 lak ngut ki nongthep vote ha ka Draft Roll, la dep ban phah notis ia ki 6,51,735 ngut. Na kitei lah dep ban aiti ia ki notis sha ki 6,46,397 ngut katba kiba dang sahteng ban pynpoi ki long na ka bynta ki 5,190, ong u Tiwari.
“Ki don baroh 5,36,468 tylli ki Hearing kiba lah dep ban pynlong, kaba mihkhmat ia ki 82.31 percent na ki notis kiba lah dep ban pynmih” ula ong.
U CEO ula kdew ba kan ym don kano kano ka jingpynduh pyndam ia ka kyrteng ki nongthep vote khlem da iaid katkum ki kyndon kiba dei ban iaid.
“Ka jingpdiang ia ki notis kam mut ba lah pynduh noh ia ka kyrteng. Kan ym don kano kano ka kyrteng kaba mih ha ka Draft Electoral Roll kaban shah pynduh noh khlem da bud ia ki kyndon treikam bad ban ai ia ka lad ba kin pynshai ialade ha ka Hearing” la ong u Tiwari.
Ula ong ha ka notis ka kynthup ia ki 2,22,786 ngut kiba don ha ka kyrdan ‘No Mapping’ bad 4,28,949 ngut kiba don jingduna bad jingbakla ha ka ‘Mapping’.
Halor ka Claims and Objections, ka jylla kala ioh pdiang ia ki aplikeshon na ki 17,061 ngut hadien ba lah dep pynmih ia ka Draft Roll, kynthup ban pynrung ia ki 9,343 ngut lyngba ka Form 6, ia ki 1,076 ngut lyngba ka Form 7 bad 6,642 ngut lyngba ka Form 8 na ka jingkynriah jaka bad ka jingpynbeit ia ki jingduna.
U Tiwari ula kyntu ia ki nongthep vote kiba dei hok, kaba ka kyrteng ka jongki kam shim la mih ha ka Draft Roll ba kidei ban phah lyngba ka Form 6 bad ban pyndep ia katei hapoh jong ka 18 tarik u Nailur kaba dei ka Tarik kaba khatduh.
Ula pyntip ruh ba lah dep ban thung ia 1,814 ngut ki Booth Level Agent da ki seng sain pyrthei ban iarap ia ki nongthep vote – NPP 736, BJP 393, VPP 320, INC 186, UDP 121 bad AITC 58.
Haba iengskhem halor ka jingpynlong ia katei ka jingthmu, u CEO ula ong, “Yn ym don kino kino ki nongthep vote kiba dei hok kiban shah ieh noh bad kino kino ki bym dei hok pat kim dei ban shah kynthup”.
Ka jingpyndep ia ka Claims bad Hearing kan iai bteng haduh ka 17 tarik u Risaw, katba ia ka Electoral Roll kaba pura yn sa pynmih ha ka 21 tarik u Risaw.
