Shillong, Nailur 15 : U MLA ka BJP Bah AL Hek ha ka sngi Ba-ar ula ong ba ka jingpynlait ba ki Jylla riewlum na ka Uniform Civil Code (UCC) ym pat lah ban ong eiei tad haduh ba ka Sorkar Pdeng kala pynmih ia ka jingpynbna.
Une u MLA ka Pynthorumkhrah ula pynpaw ia kane haba jubab ia ka jingkylli la ka Meghalaya bad kiwei ki Jylla riewlum kin lait na ka jingtreikam ka UCC.
“Bun ki ong ba ka UCC kan ym treikam ha ki jylla riewlum, lada ka long kumta mut kane ka mat iakren kala kut. Hynrei haduh mynta ngam ngeit satia tad haduh ba ngan da iohi ia ka jingpynbna” ong u Bah Hek.
U ong ba ia ka jingai jingkynthoh un lah ban leh tad hadien bala bishar ia ka jingpynbna.
“Ngin sa peit ka jingpynbna ka ong kumno. Lada ka ong ba ka UCC kan ym treikam ha ki Jylla riewlum, kan ym don eiei shuh ban iakren?. Ban ong ba Nga ngeit lane Ngam ngeit, ngam lah ban ong eiei mynta. Ngin ap tad haduh ba ngin da ioh ia ka jingpynbna” ula ong.
U Bah Hek ula kdew ia ki jingpyntip ba bun rukom kiba la saphriang ha ki social media.
“Ngim tip haduh mynta la ka long kaba shisha ne em. Ha social media, ki don ar jait ki jingkynthoh-kawei ka ong u Amit Shah ula ong ba baroh 21 tylli ki Jylla ba synshar ka BJP yn pyntreikam ia ka UCC. Kata ka dei kaba ong ha social media. Kam pat don satia ka jingpynbna ba ngin ym pyntreikam ia ka UCC ha ki Jylla riewlum” ula ong.
“Ngam ngeit iano iano ruh tad haduh ba ngan da iohi ia ka jingpynbna ba pynmih ka Sorkar” ong u Bah Hek.
